दापोली :
तालुक्यातील दाभोळ पोलीस ठाण्याच्या हद्दीतील आगरवायंगणी मधलीवाडी येथील ओंकार नथुराम बालगुडे याच्या घरुन गावठी बनावटीची बंदूक व एयर प्रिस्टलसह अन्य ऐवज दाभोळ पोलिसांनी ताब्यात घेतला. या प्रकरणी एकावर गुन्हा दाखल करण्यात आला आहे. या प्रकाराने तालुक्यात खळबळ उडाली आहे. याबाबत दाभोळ पोलिसांनी दिलेल्या माहितीनुसार, ओंकार बालगुडे (३१) याच्या ताब्यात गावठी बनावटीची बंदूक व एयर पिस्टल तसेच शिकारीसाठी वापरण्यात येणाऱ्या बॅटऱ्या व रिकाम्या वापरलेल्या काडतुसाच्या पुंगळ्या विनापरवाना बाळगल्या स्थितीत आढळल्या. बालगुडे याच्याकडून ताब्यात घेण्यात आलेल्या सुमारे २ हजार रुपये किंमतीच्या गावठी बनावटीच्या एका नळीच्या बंदुकीला लाकडी बट व ट्रिगर व ट्रिगर गार्ड असल्याचे दिसून आले. या गावठी बनावटीची बंदूक सुमारे ४८ इंच लांब व बॅरलची गोलाई ७ सेंटीमीटरची आढळून आली. त्याचप्रमाणे २ हजार रुपये किंमतीची एक काळसर व लाल रंगाची प्लास्टिक व लोखंडी बॉडी असलेली एअर पिस्टल आढळली. तिच्या बॅरल नळीपासून तिचीपाठीमागील कॅपपर्यंत लांबी सुमारे २३.५ सेंटीमीटर आहे. या प्रिस्टलवर ‘हॉक सिरीज’ असे इंग्रजीमध्ये व उजव्या बाजूस मध्यभागी ‘होक’ असे लिहिलेले आहे. तसेच काळसर राखाडी रंगाची एम झेड कंपनीची एम ९६१ मॉडेल असलेली लाल बटणे असणारी चार्जिंग बॅटरी आढळली. शिकारीसाठी वापरल्या जाणाऱ्या आणखी २ बॅटऱ्या आढळून आल्या आहेत.
दाभोळ पोलिसांनी हा सर्व मुद्देमाल, ताब्यात घेतला असून बालगुडेवर भारतीय शस्त्र अधिनियम १९४९चे कलम ३, २५ नुसार गुन्हा दाखल करण्यात आला आहे. बालगुडे याला ही बंदूक व पिस्टल कोणी पुरवले, आणखी कोणाकडे असा शस्त्रसाठा आहे, या शस्त्रांचा उपयोग शिकारीव्यतिरिक्त अन्य कोणत्या कामासाठी करण्याचा उद्देश होता का, आदी गोष्टींचा तपास करण्याचे आव्हान दाभोळ पोलिसांसमोर आहे. या प्रकरणाचा अधिक तपास दाभोळ पोलीस करीत आहेत.
