शहर परिसरात वरमहालक्ष्मी पूजन

बेळगाव : श्रावणातल्या दुसऱ्या शुक्रवारी शहर परिसरात महिलांनी मोठ्या श्रद्धेने महालक्ष्मीची पूजा बांधली. कलशावर श्रीफळ ठेवून त्यावर महालक्ष्मीचा मुखवटा उभारून पूजा केली गेली. तसेच रेशमी वस्त्र, दागिने, फळे, पाना-फुलांची आरास करण्यात आली होती. देवीला पुरणपोळीचा नैवेद्य दाखविल्यानंतर सुवासिनींची ओटी भरण्यात आली. यानिमित्त शहरातील विविध मंदिरातील देवींची सालंकृत पूजा बांधण्यात आली. शिवाय धार्मिक विधीही पार पडले. वरमहालक्ष्मी पूजेच्या निमित्ताने सर्वत्र मंगलमय वातावरण दिसून आले.