वल्लभनेनी वामसी यांना पोलिसांकडून अटक

हैदराबाद : गन्नावरम कार्यालयावर झालेल्या हल्ल्याशी निगडित प्रकरणी आंध्र प्रदेश पोलिसांनी कारवाई करत गुरुवारी वायएसआरसीपी नेते वल्लभनेनी वामसी यांना अटक केली आहे.  तेदेपच्या गन्नावरम कार्यालयावर झालेल्या हल्ल्याप्रकरणी ही कारवाई करण्यात आली आहे. गन्नावरमचे माजी आमदार वामसी यांना यापूर्वी पोलिसांकडून नोटीस बजावण्यात आली होती. वामसी यांना हैदराबादच्या रायदुर्गम भागातून अटक करण्यात आली. त्यांच्या विरोधात बीएनएस आणि एससी-एसटी अधिनियमाच्या विविध कलमांच्या अंतर्गत गुन्हा नोंद करण्यात आला आहे.  वामसी यांना झालेली अटक अवैध आहे, कारण त्यांना अंतरिम जामीन मिळाला  असल्याचा दावा वायएसआरसीपीने केला. अशाप्रकारचे सूडाचे राजकारण कधीपर्यंत चालणार असा प्रश्न वाएसआरसीपीने मुख्यमंत्री एन. चंद्राबाबू नायडू यांना विचारला आहे.