बेळगाव : यमगे (ता. कागल, जि. कोल्हापूर) गावचा युवक बिरदेव सिद्दाप्पा डोणे हा भारतीय लोकसेवा आयोगाच्या 2025 च्या परीक्षेत देशात 551 वा क्रमांक घेऊन उत्तीर्ण झाला. मेंढपाळचा व्यवसाय म्हणजेच बेळगाव सीमाभागातील विविध गावात भटकंती करत मेंढरांना चारण्याचे काम करत प्रतिकूल परिस्थितीतून भारतीय लोकसेवा आयोगाची परीक्षा बिरदेवने उत्तीर्ण केली. याबद्दल त्याचा युवा समिती सीमाभागतर्फे सत्कार करण्यात आला. या प्रसंगी युवा समिती कार्याध्यक्ष धनंजय पाटील यांनी, बिरदेव डोणे याने मराठीतून शिक्षण घेऊन प्रतिकूल परिस्थितीतून यशाला गवसणी घातली आहे. त्याने मंडोळी रोड भागात भटकंती करत आपल्या परिवारासह झोपडीत राहून हे यश गाठले याचे कौतुक आहे. याची प्रेरणा सर्वांनी घ्यावी, असे प्रतिपादन केले.
अध्यक्ष शुभम शेळके यांच्या हस्ते शाल व पुष्पगुच्छ देऊन बिरदेवचा सत्कार करण्यात आला. यावेळी शुभम शेळके यांनी बिरदेवने मिळविलेले यश जिद्द व चिकाटीच्या जोरावर संपादन केले आहे. प्रत्येकाने आपल्या मातृभाषेतून शिक्षण घेतले पाहिजे. बिरदेवचा खडतर प्रवास पाहता त्याचे हे यश कौतुकास्पद असून वाखाणण्याजोगे आहे. संत तुकारामांच्या पंक्तांप्रमाणे ‘असाध्य ते साध्य करिता सायास, कारण अभ्यास तुका म्हणे’ याप्रमाणे बिरदेवचे कौतुक करून शुभेच्छा दिल्या. सत्काराला उत्तर देताना बिरदेव याने युवा समितीचे आभार मानले. प्रत्येकाने आपल्या मातृभाषेतून शिक्षण घेताना कुठलाही संकुचितपणा न आणता यशाची गुऊकिल्ली जाणली पाहिजे. आर्थिक परिस्थितीची काळजी न करता जिद्दीने शिक्षण घेतले पाहिजे. प्रत्येकाने निर्व्यसनी राहून समाजाला चांगली दिशा दिली पाहिजे, असे मत व्यक्त केले. यावेळी सरचिटणीस मनोहर हुंदरे, उपाध्यक्ष प्रवीण रेडेकर, विजय जाधव, भागोजी पाटील, अशोक घगवे, राजू पाटील, रणजीत हावळाण्णाचे, रमेश माळवी, सचिन दळवी, दीपक गौंडवाडकर, शुभम जाधव, अभिषेक कारेकर, अशोक डोळेकर, विश्वनाथ येळ्ळूरकर आदी उपस्थित होते.
