मनोज पाटील ‘सामनावीर’, पार्थ नयनी ‘मालिकावीर’
बेळगाव : सिग्नीचर स्पोर्ट्स क्लब आयोजित नरेंद्र कुलकर्णी चषक टी-20 क्रिकेट स्पर्धेच्या अंतिम सामन्यात युनियन जिमखाना संघाने एसकेई संघाचा 57 धावांनी पराभव करुन नरेंद्र कुलकर्णी चषक पटकाविला. पार्थ नयनी ‘मालिकावीर’ तर मनोज पाटील ‘सामनावीर’ पुरस्काराने गौरविण्यात आले. एसकेई प्लॅटिनम ज्युब्ली मैदानावर खेळविण्यात आलेल्या पहिल्या उपांत्य फेरीच्या सामन्यात एसकेई संघाने प्रथम फलंदाजी करताना 20 षटकात 8 गडी बाद 139 धावा केल्या. त्यात शिवप्रकाश हिरेमठने 6 चौकगारांसह 66, अशोक सिंगने 4 चौकारांसह 25 तर अक्षय धोंगडीने 21 धावा केल्या. सिगनतर्फे राहुल बजंत्री व विरेश गौडर यांनी प्रत्येकी 2 गडी बाद केले. प्रत्युत्तरादाखल खेळताना सिगन संघाचा डाव 17.3 षटकात 113 धावांत आटोपला. त्यात भावित पुजारीने 2 षटकार, 4 चौकारांसह 27, माजीद मकानदारने 1 षटकार 2 चौकारांसह 18 धावा केल्या. एसकेईतर्फे गुरुव टी. व पार्थ निपाणी तसेच अक्षय धोंगडी यांनी प्रत्येकी 3 गडी बाद केले.
दुसऱ्या उपांत्य फेरीच्या सामन्यात के. आर. शेट्टी किंग्ज संघाने प्रथम फलंदाजी करताना 20 षटकात 8 गडी बाद 162 धावा केल्या. त्यात प्रशांत लायंदरने 3 षटकार 8 चौकारांसह 65, गिरीश नाडकर्णीने 1 षटकार 4 चौकारांसह 31 धावा केल्या. जिमखानातर्फे वैभव कुरुबागी व रोहीत देसाई यांनी प्रत्येकी 2 गडी बाद केले. प्रत्युत्तरादाखल खेळताना युनियन जिमखानाने 18.3 षटकात 7 गडी बाद 164 धावा करुन सामना 3 गड्यांनी जिंकला. त्यात राहुल नाईकने 8 षटकार 3 चौकारांसह 29 चेंडूत 73, शुभम भादवनकरने 1 षटकार 3 चौकारांसह 26 धावा केल्या. के. आर. शेट्टी किंग्जतर्फे आनंद माळवीने 3 गडी बाद केले.
अंतिम सामन्यात युनियन जिमखाना संघाने प्रथम फलंदाजी करताना 19.1 षटकात सर्वगडी बाद 160 धावा केल्या. त्यात राहुल नाईकने 3 षटकार, 3 चौकारांसह 38, मनोज पाटीलने 2 षटकार 3 चौकारांसह नाबाद 31 तर मिलिंद चव्हाणने 1 षटकार 4 चौकारांसह 25 धावा केल्या. एसकेईतर्फे पार्थ नयनीने 3 तर पंकज कुनाल, अशोक सिंग व गौरव टी. यांनी प्रत्येकी 2 गडी बाद केले. प्रत्युत्तरादाखल खेळताना एसकेईचा डाव 16.3 षटकात 103 धावांत आटोपला. त्यात अशोक सिंगने 3 चौकारांसह 33, देवदास कम्मारने 1 षटकार 2 चौकारांसह 21 धावा केल्या. जिमखानातर्फे मनोज पाटीलने 4, आदर्श हिरेमठ, शुभम भादवनकर यांनी प्रत्येकी 2 गडी बाद केले.
सामन्यानंतर प्रमुख पाहुणे आनंद सराफ, चंदन कुंदरनाड, आनंद करडी, गजानन जैनोजी, गजानन सिद्धलिंग, देवेंद्र कुडची, स्पर्धा सचिव अमरदीप पाटील आदी मान्यवरांच्या हस्ते वजेत्या जिमखाना, उपविजेत्या एसकेई संघला चषक देवून गौरविण्यात आले. अंतिम सामन्यातील ‘सामनावीर’ मनोज पाटील जिमखाना, उत्कृष्ट फलंदाज वैभव कुरुबागी-जिमखाना, उकृष्ट गोलंदाज गौरव तेलंजी-एसकेई, इम्पॅक्ट खेळाडू अशोक सिंग-एसकेई, ‘मालिकावीर’ पार्थ नयनी-एसकेई यांना चषक देवून गौरविण्यात आले. अंतिम सामन्यासाठी पंच म्हणून तेजस पवार, संदीप मुरारी, शेहजाद यांनी काम पाहिले तर स्पर्धेसाठी अनंत, जयेश,शुभम यांनी विशेष परिश्रम घेतले.
