युनियन जिमखानाला अ.भा.एक्सपोझर जेतेपद

मडगाव : नाशिकच्या द्वारका क्रिकेट अकादमीचा 27 धावानी पराभव करून बेळगावच्या युनियन जिमखानाने 13 वर्षांखालील अखिल भारतीय कुमार क्रिकेट स्पर्धा सलग दुसऱ्यांदा जिंकली. येथील कोंकण रेल्वेच्या मैदानावर स्पर्धेचे आयोजन झाले. नाणेफक जिंकून प्रथम फलंदाजी स्वीकारलेल्या युनियन जिमखानाने निर्धारीत 20 षटकात 4 बाद 103 धावा केल्या. त्यांच्या मोहम्मद हमझाने 23, टी. सचिनने 34 तर आयुष माळवीने 14 धावा केल्या. द्वारका क्रिकेट अकादमीच्या अर्चित धत्रक व राजवीर मुल्लानीने प्रत्येकी एक गडी बाद केला. उत्तदाराखल फलंदाजीस उतरलेल्या द्वारका क्रिकेट अकादमीचा डाव युनियन जिमखानाच्या गोलंदाजांनी 17.4 षटकात केवळ 76 धावात उखडला. जिमखानाच्या साईराज पोरवाल, अथर्व होंगल व मोहम्मद हमझाने प्रत्येकी दोन तर मोहम्मद झियान सालेमवाले व आयुष माळवीने प्रत्येकी एक गडी बाद केला. द्वारका क्रिकेट अकादमीच्या अमन कातकाडेने 17 तर पार्थ जाधवने 10 आणि नीरव जाधवने नाबाद 10 धावा केल्या.