समुद्री ड्रोनने पहिल्यांदाच हल्ला : हेरगिरीसाठी निर्मिती
वृत्तसंस्था/ कीव
युक्रेनियन नौदलाचे सर्वात मोठे जहाज सिम्फेरोपोल गुरुवारी रशियन समुद्री ड्रोन हल्ल्यानंतर बुडाले. रशियन संरक्षण मंत्रालयाच्या हवाल्याने स्पुतनिक न्यूज एजन्सीने ही माहिती दिली आहे. हे जहाज गेल्या 10 वर्षांतील युक्रेनचे सर्वात मोठे जहाज होते. ते लगून-क्लास जहाज (कोस्टल एरिया जहाज) होते. त्याची निर्मिती प्रामुख्याने हेरगिरीसाठी करण्यात आली होती. युक्रेनच्या ओडेसा भागातील डॅन्यूब नदीजवळ हा ड्रोन हल्ला झाला. रशियाने समुद्री ड्रोनने युक्रेनियन जहाज नष्ट करण्याची ही पहिलीच वेळ असल्याचे अहवालात म्हटले आहे. एका ड्रोन तज्ञाने हे रशियासाठी मोठे यश असल्याचे वर्णन केले आहे. युक्रेननेही जहाजावरील हल्ल्याची पुष्टी केली आहे.
सिम्फेरोपोल जहाज 2019 मध्ये लाँच करण्यात आले होते. 2021 मध्ये ते युक्रेनियन नौदलात सामील झाले. तथापि, 2014 नंतर युक्रेनने लाँच केलेले हे सर्वात मोठे जहाज होते. युक्रेनियन नौदलाने दिलेल्या माहितीनुसार, या हल्ल्यात एक क्रू मेंबर मारला गेला, तर अनेक जण जखमी झाले. हल्ल्यानंतर परिस्थिती नियंत्रणात आणण्याचे प्रयत्न सुरू आहेत. जहाजातील बहुतेक क्रू मेंबर सुरक्षित आहेत, परंतु काही बेपत्ता लोकांचा शोध सुरू असल्याचे प्रवक्त्याने सांगितले.
राजधानी कीववरही हवाई हल्ला
रशियाने युक्रेनची राजधानी कीववरही मोठा हवाई हल्ला केला आहे. या हल्ल्यात 14 लोक ठार झाले असून 48 जण जखमी आहेत. मृतांमध्ये तीन मुलांचा समावेश आहे. हल्ल्यात शहराच्या मध्यवर्ती भागाला लक्ष्य करण्यात आले. अमेरिकेच्या नेतृत्वाखालील शांतता प्रयत्न सुरू असताना हा हल्ला झाला. रशियाने रात्रभर बॉम्बस्फोट करून निष्पाप लोकांना मारले आणि अनेक सार्वजनिक मालमत्ता नष्ट केल्याचे युक्रेनचे म्हणणे आहे.
युक्रेनियन हवाई दलाच्या म्हणण्यानुसार, रशियाने वेगवेगळ्या ठिकाणी 598 ड्रोन आणि 31 क्षेपणास्त्रs डागली. ढिगाऱ्यात अडकलेल्या लोकांना वाचवण्याचे काम सुरू आहे. या हल्ल्यानंतर संतप्त झालेल्या युक्रेनने नाराजी व्यक्त केली आहे. रशिया चर्चेऐवजी क्षेपणास्त्रांचा मार्ग निवडत आहे. जगाने शांततेसाठी पावले उचलली पाहिजेत, असे युक्रेनचे अध्यक्ष वोलोदिमिर झेलेन्स्की यांनी ‘एक्स’वर म्हटले आहे.
सर्व लक्ष्यांवर अचूक हल्ले : रशिया
युक्रेनमध्ये निवडलेल्या सर्व लक्ष्यांवर अचूक हल्ले केल्याचे रशियाच्या संरक्षण मंत्रालयाने म्हटले आहे. या हल्ल्यात किन्झल क्षेपणास्त्रs आणि ड्रोनचा वापर करण्यात आला. रशियाने युक्रेनियन लष्करी तळ, विमानतळ आणि एका गुप्तचर विमानाला लक्ष्य केल्याचा दावा केला. तसेच, रशियाने पूर्व युक्रेनमधील नेलिपिव्हका गाव ताब्यात घेण्याबद्दलही भाष्य केले. या हल्ल्यात युरोपियन युनियन दूतावासाच्या इमारतीचेही नुकसान झाले.
