हुबळी रेल्वे यार्डमधून साहित्य चोरणाऱ्या रेल्वेच्या दोन कंत्राटी कामगारांना अटक

बेळगाव : हुबळी रेल्वे यार्ड परिसरातील स्टोअरमधून लाखोंचे साहित्य चोरी केल्याच्या आरोपावरून आरपीएफच्या अधिकाऱ्यांनी रेल्वेमध्ये काम करणाऱ्या दोन कंत्राटी कामगारांना अटक केली आहे. यामध्ये एका महिलेचाही समावेश आहे. 12 जुलै 2025 रोजी कॅरेज अँड व्हॅगन स्टोअरमधून ग्रॅव्हिटी कॉक्स 521 नग, सॉफ्ट फ्लश व्हॉल्व 4 नग, बीबी कॉक्स 347 नग, बीबी कॉक्स ऑटोकट 15 नग, बीबी कॉक्स वंदे भारत 20 नग, बॉल व्हॉल्व 60 नग, 7 एअरवेंट वॉटर टँक असे एकूण 3 लाख 32 हजार रुपयेहून अधिक किमतीचे साहित्य चोरण्यात आले होते. हुबळी आरपीएफचे निरीक्षक आर. डी. समुद्रे, उपनिरीक्षक एम. ज्योतीस्वरुप, जी. गौरी नायडू, पी. नागराजू नायडू, शरणाप्पा, हवालदार एन. टी. पुट्टण्णावर, एन. एस. गौरी, एस. एम. रफी आदींचा समावेश असलेल्या पथकाने ही कारवाई केली आहे. अटक करण्यात आलेल्या दोन कंत्राटी कामगारांना हुबळी येथील जेएमएफसी न्यायालयासमोर हजर करण्यात आले असून न्यायालयाच्या आदेशावरून 30 जुलैपर्यंत त्यांची रवानगी न्यायालयीन कोठडीत करण्यात आली आहे.