पुणे / वार्ताहर :
पतीपासून वेगळे राहत असलेल्या महिलेला प्रेमाच्या जाळय़ात अडकवून तिच्या मुलाला सांभाळण्याचे आश्वासन देऊन बलात्कार करणाऱ्या गुन्हे शाखेतील एका पोलिसावर बलात्कार तर तिला शिवीगाळ करणाऱ्या त्याच्या सहकारी पोलीस साथीदाराचे प्राथमिक चौकशीअंती निलंबन करण्यात आले आहे. पोलीस उपायुक्त अमोल झेंडे यांनी यासंदभांतील आदेश दिले आहेत.
याप्रकरणी कादिर कलंदर शेख, समीर पटेल अशी निलंबीत करण्यात आलेल्या दोघांची नावे आहेत. याबाबत एका महिलेने लष्कर ठाण्यात फिर्याद दिली आहे. याप्रकरणात बलात्कार, ॲट्रॉसिटी, जबरी चोरीच्या विविध कलमान्वये गुन्हा दाखल करण्यात आला आहे. पतीपासून ती वेगळी राहत होती. तिला एक मुलगा देखील आहे. पीडित महिलेशी आरोपी कादिर शेख याची तीन वर्षांपूर्वी ओळख झाली होती. शेखने तिला विवाहाचे आमिष दाखवून वेळोवेळी तिच्यावर बलात्कार केला. दरम्यानच्या काळात महिलेने त्याच्याकडे विवाहाबाबत विचारणा केली. तेव्हा त्याने टाळाटाळ केली. महिलेला लष्कर भागातील एका हॉटेलजवळ बोलावून आरोपी कादिर शेख, समीर पटेल त्यांचे दोन साथीदार आणि बुरखा परिधान केलेल्या महिलेने मारहाण केली तसेच मोबाईल हिसकावून नेला, असे पीडित महिलेने फिर्यादीत म्हटले आहे.
या प्रकारानंतर आता पोलीस उपायुक्तांनी शेख आणि पटेल या दोन पोलीस कर्मचाऱ्यांना निलंबीत केले आहे. सहायक पोलीस आयुक्त अश्विनी राख तपास करीत आहेत.
