बचावासाठी गेलेल्या कारचालकाचाही मृत्यू : मुरगुंडी मार्गावरील घटना : चारजण जखमी
वार्ताहर/अथणी
कागवाड-विजापूर राज्यमार्गावरील मुरगुंडी येथील बनजवाड पी. यु. कॉलेजजवळ वीट भरून जाणारा ट्रक व उसाची रोपे घेऊन जाणाऱ्या पिकअप वाहनाची समोरासमोर धडक झाल्याची घटना गुरुवारी मध्यरात्री घडली. या अपघातात पिकअप वाहनातील दोघेजण जागीच ठार झाले. तर अपघात होताच बचावासाठी गेलेल्या कारचालकाला अन्य एका कारने धडक दिल्याने त्याचाही मृत्यू झाल्याची घटना घडली. या अपघातात चारजण जखमी झाले आहेत.
शुभम युवराज चव्हाण (वय 24, रा. कुटवाड, ता. शिरोळ, जि. कोल्हापूर), महेश सुभाष गाताडे (वय 30, रा. गणेशवाडी ता. शिरोळ, जि. कोल्हापूर) अशी पिकअप वाहनातील ठार झालेल्यांची नावे आहेत. तर सचिन विलास माळी (वय 42) असे बचावासाठी घटनास्थळी गेलेल्या मृताचे नाव आहे.घटनेविषयी अधिक माहिती अशी, ट्रक क्रमांक केए 28 एए 5381 मधून रत्नागिरी येथून चिराविट भरून विजापूरच्या दिशेने जात होता.
तर अथणीहून कागवाडच्या दिशेने उसाची रोपे घेऊन पिकअप वाहन क्रमांक एमएच 10 सीआर 9877 जात होते. गुरुवारी मध्यरात्री मुसळधार पाऊस सुरु होता. त्यातून मार्ग काढत जाणाऱ्या या वाहनांची मुरगुंडी येथे येताच समोरासमोर जोराची धडक झाली. त्यात शुभम चव्हाण, महेश गाताडे हे जागीच ठार झाले. तर अपघातस्थळी मदत करण्यासाठी पुढे गेलेले सचिन माळी यांना कार क्रमांक केए 22 एमसी 9251 ने धडक दिली, त्यात त्यांचाही मृत्यू झाला.
दरम्यान, अपघात होताच अन्य एका कारमधील नागरिक बचावासाठी गेले असता त्यांनाही दुखापत झाली. त्यांच्यावर सरकारी दवाखान्यात उपचार करुन सोडण्यात आले. घटनेची माहिती मिळताच अथणीचे पीएसआय मल्लिकार्जुन उप्पार व त्यांच्या सहकार्यांनी घटनास्थळी धाव घेऊन मदतकार्य सुरु केले. यावेळी त्यांना सचिन माळी-कवलापूर, महेश गाताडे-गणेशवाडी ता. शिरोळ, शुभम चव्हाण रा. कुपवाड, ता. शिरोळ यांनी पोलिसांना मदत केली. पण जोराच्या पावसामुळे मदतकार्यात अडथळे आले. अथणी शासकीय दवाखान्यात विच्छेदन करुन मृतदेह नातेवाईकांच्या ताब्यात देण्यात आले. अपघाताची नोंद अथणी पोलिसात झाली आहे. अधिक तपास पोलीस करत आहेत.
