पंजाबमध्ये रेल्वे अपघात : इंजिन धडकून प्रवासी रेल्वेवर कोसळले
वृत्तसंस्था/ चंदीगड
पंजाबमधील फतेहगढ साहिबमध्ये रविवारी पहाटे साडेतीन ते चार वाजण्याच्या सुमारास दोन मालगाड्यांची टक्कर झाली. यापैकी एकाचे इंजिन उलटले आणि बाजूच्या ट्रॅकवरून जाणाऱ्या प्रवासी रेल्वेला धडकले. तसेच मालगाड्यांचे मागील काही डबे रुळावरून घसरून प्रवासी रेल्वेवर कोसळलेले दिसून येत होते. या दुर्घटनेत मालगाडीचे दोन लोको पायलट जखमी झाले असून त्यांना पटियाला येथील हॉस्पिटलमध्ये दाखल करण्यात आले आहे. सुदैवाची बाब म्हणजे या अपघातात मोठी जीवितहानी झाली नाही.
फतेहगढ साहिब येथे एक मोठी दुर्घटना घडली आहे. सरहिंद रेल्वे स्थानकापासून हाकेच्या अंतरावर असलेल्या माधोपूर चौकीजवळ रविवारी पहाटे मालगाड्यांची समोरा-समोर टक्कर झाल्याने सदर मार्गावरील सेवा विस्कळीत झाली. धडक बसताच मालगाडीचे इंजिन उलटले. मालगाडीचे इंजिन आणि काही डबे प्रवासी रेल्वेला धडकताच त्यातून प्रवास करणाऱ्या शेकडो प्रवाशांमध्ये एकच हाहाकार उडाला. तसेच दुसरीकडे, अंबाला ते लुधियाना अप मार्ग पूर्णपणे ठप्प झाला होता. या अपघातात विकास कुमार (37) आणि हिमांशू कुमार (31, रा. सहारनपूर, उत्तर प्रदेश) हे दोन लोको पायलट जखमी झाले. 108 ऊग्णवाहिकेच्या मदतीने त्यांना फतेहगढ साहिबच्या सिव्हिल हॉस्पिटलमध्ये दाखल करण्यात आले. त्यांची प्रकृती गंभीर असल्याने डॉक्टरांनी त्यांना राजिंद्र हॉस्पिटल, पटियाला येथे रेफर केले आहे.
मिळालेल्या माहितीनुसार, माल गाड्यांसाठी बांधलेल्या डीएफसीसी ट्रॅकच्या न्यू सरहिंद स्टेशनजवळ हा अपघात झाला. याठिकाणी आधीच कोळसा भरलेल्या दोन मालगाड्या उभ्या होत्या. याचदरम्यान एका मालगाडीचे इंजिन दुसऱ्या गाडीला धडकल्यानंतर इंजिन उलटले आणि अंबालाहून जम्मू तावीकडे जाणाऱ्या समर स्पेशल टेनवर कोसळले. अपघाताची माहिती समजताच अंबाला विभागाच्या डीआरएमसह रेल्वे, जीआरपी आणि आरपीएफचे वरिष्ठ अधिकारीही घटनास्थळी पोहोचले होते.
