बाजारात खरेदीची लगबग ः शहरात सायंकाळी विवाहाची धामधूम
प्रतिनिधी/ बेळगाव
शहर परिसरात शनिवारपासून तुळशी विवाहाला मंगलमय वातावरणात प्रारंभ झाला आहे. त्यामुळे दिवाळी, पाडवा, भाऊबीजनंतर आता तुळशी विवाहाची धामधूम सुरू झाली आहे. शनिवारी सायंकाळी शहर आणि उपनगरांत पारंपरिक पद्धतीने तुळशी विवाह पार पडले.
कोरोनाच्या संकटानंतर यंदा तुळशी विवाह थाटात साजरे होत आहेत. त्यामुळे सर्वत्र उत्साही वातावरण दिसून येत आहे. याबरोबरच बाजारात तुळशी विवाह पूजेच्या साहित्याची मागणी वाढली आहे. विशेषतः तुळशीचे नवे रोप, कुंडय़ा, ऊस, रांगोळी, हिरवा चुडा, झेंडूची फुले, हळदी-कुंकू, आवळे, चिंच आणि आंतरपाट यांना मागणी वाढली आहे. मागील दोन वर्षात सण-उत्सवांवर मर्यादा आल्या होत्या. मात्र यंदा सण-उत्सव मोठय़ा उत्साहात साजरे होत आहेत. त्यामुळे तुळशी विवाहदेखील धुमधडाक्मयात होत आहेत.
शनिवारपासून सुरू झालेले तुळशी विवाह मंगळवार दि. 8 रोजीच्या तुळशी पौर्णिमेपर्यंत चालणार आहेत. या पार्श्वभूमीवर बाजारात तुळशी विवाहासाठीची खरेदी वाढली आहे. हिरव्या बांगडय़ांचा चुडा असलेली पाकिटे, कापसाच्या वाती, नारळ, ऊस, चुरमुरे, बत्ताशा यासह हार-फुलांना मागणी वाढली आहे. याबरोबर तुळशी विवाहासाठी लागणारी पुस्तके, आरती संग्रह बाजारात दाखल झाले आहेत. विशेषतः झेंडूच्या फुलांची आणि उसाची आवक वाढली आहे. साधारण 60 ते 70 रुपयांना पाच ऊस अशी विक्री सुरू आहे. त्याबरोबर तुळशी विवाहासाठी फळांची मागणी वाढली आहे. पाच फळांचा नग 70 रुपयांना विकला जात आहे. पुढील दोन-तीन दिवस तुळशी विवाह चालणार असल्याने बाजारात खरेदीची लगबग पाहायला मिळत आहे.
शहर परिसरात तुळशी विवाहाची धामधूम
शहर परिसरात शनिवारी सायंकाळी तुळशी विवाहाची धामधूम पाहायला मिळाली. घराच्या अंगणात किंवा परसात असलेल्या तुळशीचा विवाह पारंपरिक पद्धतीने पार पडला. कोरोना निर्बंधानंतर यंदा तुळशी विवाहाला थाटात आणि चैतन्याच्या वातावरणात सुरुवात झाली.
