विज वाहिनीसह कोणत्याही क्षणी कोसळण्याची शक्यता
ओटवणे प्रतिनिधी
माजगाव – चराठा मुख्य रस्त्यालगतचे जीर्ण झाड लगतच्या विज वाहिनीसह कोणत्याही क्षणी कोसळण्याची शक्यता आहे. त्यामुळे या ठिकाणी अनर्थ घडण्याची शक्यता असून विज वितरणसह सार्वजनिक बांधकाम खाते या ठिकाणी अपघाताची वाट पाहत आहे का? असा संतप्त सवाल या मार्गावरील वाहन चालकांसह ग्रामस्थानी केला आहे. दरम्यान याबाबत चराठा येथील सामाजिक युवा कार्यकर्ते श्रीधर ऊर्फ बाळा बोंद्रे यांनी या धोकादायक झाडाला लागूनच असलेल्या विज वाहिनीचा धोका ओळखून याकडे विज वितरणाच्या अधिकाऱ्यांचे लक्ष वेधले होते. मात्र याबाबत कोणतीही कार्यवाही न करता उलट विज वाहिनीवरील हे झाड तोडण्यासाठी साडे चार हजार रूपये भरण्यास सांगितले. त्यामुळे विज वितरणाच्या या बेजबाबदारपणाबाबत तीव्र संताप आहे.
ओटवणे दशक्रोशीत वाहतुकीच्या दृष्टीने हा महत्त्वाचा मार्ग असून हा रस्ता पुढे दोडामार्ग तालुक्यात जातो. ओटवणे दशक्रोशितील जनतेला सावंतवाडीत येण्या जाण्यासाठीही हा सर्वात जवळचा मार्ग आहे. त्यामुळे या मार्गावर वाहनांची नेहमी वर्दळ असते. मात्र माजगाव – चराठा मुख्य रस्त्यालगचे भर रस्त्यावर झुकलेले हे जीर्ण झाडे वाहन चालकांसाठी धोक्याची घंटा आहे. कोणत्याही क्षणी हे झाडे लगतच्या वीज वाहिनीसह कोसळू शकते अशी स्थिती आहे.विज वितरणसह सार्वजनिक बांधकाम खात्याने याची त्वरीत दखल घेऊन हे झाड त्वरीत हटवावे. आणि संभाव्य अनर्थ टाळावा. अन्यथा या ठिकाणी दुर्घटना घडल्यास याला विज वितरणसह सार्वजनिक बांधकाम खाते जबाबदार राहणार असल्याचा इशारा ओटवणे दशक्रोशीतील वाहन चालकानी दिला आहे.
