सदाशिवनगर रेलनगर येथे झाड कोसळले

बेळगाव : मुसळधार पाऊस आणि वाऱ्यामुळे शहरासह उपनगरात झाडांची पडझड सुरूच आहे. सोमवारी रात्री सदाशिवनगर रेलनगर येथे एक झाड उन्मळून पडले आहे. केवळ सुदैवाने यात कोणतीही दुर्घटना घडली नसली तरी परिसरातील रहिवाशांमध्ये भीतीचे वातावरण निर्माण झाले आहे. कोसळलेले झाड तातडीने हटवून रस्ता खुला करून द्यावा, अशी मागणी केली जात आहे. पावसाळ्यापूर्वी शहरातील धोकादायक झाडे आणि फांद्या हटविण्यासंदर्भात महापालिकेत अनेकवेळा चर्चेचे गुऱ्हाळ रंगले. मात्र प्रत्यक्षात कोणतीच कार्यवाही झालेली नाही. त्यामुळे विविध ठिकाणी झाडांची पडझड होऊन सरकारी व खासगी मालमत्तांचे नुकसान होत आहे. सोमवारी रात्री सदाशिवनगर येथील रेलनगर येथे झाड उन्मळून पडले. मंगळवारी सकाळी स्थानिक रहिवाशांनी ही माहिती महापालिका व वनखात्याला दिली. मात्र कोणतेच अधिकारी व कर्मचारी झाड हटविण्यासाठी आले नाहीत. त्यामुळे मंगळवारी सायंकाळपर्यंत झाड तसेच रस्त्यावर पडून होते. परिणामी या मार्गावरून ये-जा करणाऱ्या नागरिकांना नाहक त्रास सहन करावा लागला.