परवानगीशिवाय पैशांची वाहतूक, 5 कोटी जप्त

बेळगाव : जिल्हा मध्यवर्ती बँकेसंबंधीच्या पैशांची वाहतूक करताना निवडणूक आयोगाच्या मार्गसूचींचे पालन केले नाही म्हणून 5 कोटी रुपये जप्त करण्यात आले आहेत. मंगळवारी अंकलगी पोलीस स्थानकाच्या कार्यक्षेत्रातील यद्दलगु• चेकपोस्टवर ही कारवाई करण्यात आली आहे. एका वाहनातून 5 कोटी रुपयांची वाहतूक करण्यात येत होती. निवडणूक आयोगाने बँक किंवा इतर आर्थिक संस्थांना पैशांची वाहतूक करण्यासाठी नियमावली जारी केली आहे. मोठी रक्कम वाहतूक करताना परवानगी घेण्याची सूचना करण्यात आली आहे. मात्र कोणत्याही सक्षम प्राधिकरणाची परवानगी न घेता 5 कोटी रुपयांची वाहतूक करण्यात येत होती. चेकपोस्टवर वाहन अडवून तपासणी केली असता मोठी रक्कम आढळून आली. पोलीस व एफएसटी पथकातील अधिकाऱ्यांनी ही रक्कम ताब्यात घेऊन गोकाक येथील ट्रेझरीत ठेवली आहे. हे प्रकरण सध्या त्रिसदस्य समितीकडे सोपविण्यात आले आहे. बँकांनी पैशांची वाहतूक करताना केईईएम अॅपमध्ये त्याची माहिती नोंदवावी, अशी सूचना बँक अधिकाऱ्यांची बैठक घेऊन करण्यात आली आहे. जिल्हाधिकारी नितेश पाटील यांनी बँक प्रतिनिधींची बैठक घेतली आहे. एटीएममध्ये भरण्यासाठी पैसे घेऊन जातानाही निवडणूक आयोगाच्या अधिकाऱ्यांना माहिती देण्याची सूचना करण्यात आली आहे. बँका किंवा सोसायट्यांची नावे पुढे करून बेकायदा पैशांची वाहतूक होऊ नये, यासाठी खबरदारी घेण्यात येत असल्याचे वरिष्ठ अधिकाऱ्यांनी सांगितले.