कोल्हापूर :
जिल्ह्यातील 20 तृतीयपंथींना मंगळवारी जिल्हाधिकारी अमोल येडगे यांच्या हस्ते डिजिटल रेशनकार्डचे वितरण करण्यात आले. जिल्हाधिकारी यांच्या केबिनमध्ये हा कार्यक्रम झाला.
जिह्यातील तृतीयपंथी, सेक्स वर्कर (वारांगना), देवदासी, तमाशा कलावंत, एचआयव्ही बाधित इत्यादी व्यक्ती शासकीय कागदपत्रांअभावी शासकीय योजनांच्या लाभापासून वंचित राहू नयेत यासाठी जिल्हा प्रशासनाने पुढाकार घेतला आहे. याचाच एक भाग म्हणून अन्नधान्य वितरण अधिकारी कार्यालयाच्या वतीने वंचित घटकांना रेशन कार्ड दिले जात आहे. मंगळवारी जिल्हाधिकारी अमोल येडगे यांच्या हस्ते जिल्हाधिकारी कार्यालयात प्राधान्य कुटुंब लाभ योजने अंतर्गत 20 व्यक्तींना मोफत शासकीय धान्य वितरणासाठीचे डिजिटल रेशनकार्ड वितरीत करण्यात आले.
यावेळी जिल्हाधिकारी येडगे म्हणाले, तृतीयपंथी, सेक्स वर्कर (वारांगना), देवदासी, तमाशा कलावंत, एचआयव्ही बाधित व्यक्तींसाठी शासनाकडून अनेक योजना राबविण्यात येत आहेत. या शासकीय योजनांचा लाभ घेण्यासाठी या सर्व व्यक्तींनी समाजकल्याण विभागाशी संपर्क साधून ओळखपत्र प्राप्त करुन घ्यावे, यावेळी कोल्हापूर शहराचे अन्नधान्य वितरण अधिकारी नितीन धापसे–पाटील, पुरवठा निरीक्षक महेश काटकर, कोल्हापूर जिल्हा रेशन संघटनेचे जिल्हा अध्यक्ष डॉ.रवींद्र मोरे, उपाध्यक्ष गजानन हवालदार, तृतीयपंथी कल्याणकारी मंडळाच्या राष्ट्रीय सदस्य मयुरी आळवेकर आदी उपस्थित होते.
- लाभार्थ्यांना मिळाली आधार कार्ड
जिल्हा पुरवठा अधिकारी मोहिनी चव्हाण यांच्या मार्गदर्शनाखाली अन्नधान्य वितरण अधिकारी नितीन धापसे–पाटील यांनी पुढाकार घेऊन यापूर्वी विशेष शिबिर घेऊन लाभार्थ्यांचे आधार कार्ड बनवून घेतले. यानंतर त्यांना मोफत अन्नधान्य वितरणासाठीच्या प्राधान्य कुटुंब लाभ योजनेसाठी पात्र करण्यात आले.
- आणखीन 200 व्यक्तीना मिळणार कार्ड
मैत्री संघटनेच्यावतीने मयुरी आळवेकर यांनी याबाबत पुरवठा कार्यालयाकडे यासाठी पाठपुरावा केला होता. यापूर्वीही 25 व्यक्तींना या योजनेतून लाभ दिला आहे. या वंचित घटकातील उर्वरीत 200 व्यक्तींनी समाज कल्याण विभागाकडून ओळखपत्र लवकरात लवकर प्राप्त करुन घ्यावे, जेणेकरून त्यांना डिजिटल रेशन कार्ड वितरित करता येईल, असे आवाहन जिल्हाधिकारी येडगे यांनी केले.
