प्रशिक्षणार्थी वैमानिक पुन्हा झेपावणार डीजीसीएची अटींसह परवानगी

बेळगाव : मागील काही महिन्यांपासून बेळगावमध्ये बंद असलेले वैमानिक प्रशिक्षण पुन्हा एकदा सुरू होणार आहे. रेडबर्ड ट्रेनिंग अकॅडमीला प्रशिक्षण सुरू करण्याच्या सूचना डीजीसीएने दिल्या आहेत. त्यामुळे बेळगावसह देशातील पाचही वैमानिक प्रशिक्षण केंद्रे पुन्हा सुरू करण्याचा निर्णय रेडबर्डने घेतला आहे. बेळगाव विमानतळावर फ्लाईंग ट्रेनिंग ऑर्गनायझेशन मंजूर करण्यात आले. बेळगाव विमानतळाला दोन वैमानिक प्रशिक्षण केंद्रे देण्यात आली. दिल्ली येथील रेडबर्ड तर बेंगळूर येथील समवर्धने फ्लाईंग अकॅडमींना मंजुरी देण्यात आली. बेळगाव विमानतळावरील 5 हजार चौरस फूट जागा भाडेतत्त्वावर दिली आहे. त्याचबरोबर मुख्य धावपट्टीपासून प्रशिक्षण केंद्रापर्यंत टॅक्सी ट्रॅक तयार केला आहे. मागीलवर्षी रेडबर्ड कंपनीने वैमानिक प्रशिक्षणाला सुरुवात केली. यामुळे विमान प्रशिक्षण घेणे बेळगावमध्येही शक्य होऊ लागले. परंतु, रेडबर्ड कंपनीच्या प्रशिक्षणावेळी बारामती येथे अपघात झाला होता. बेळगावमध्येही एअरक्राफ्ट भरकटून शेतवडीत कोसळले होते. यामुळे सुरक्षेच्या दृष्टिकोनातून प्रशिक्षण थांबविण्यात आले होते. यामुळे बेळगावसोबतच कलबुर्गी, निलाबरी (आसाम), सेओनी (मध्यप्रदेश) व बारामती (महाराष्ट्र) येथील प्रशिक्षण थांबविण्यात आले होते. वर्षभराच्या प्रतीक्षेनंतर डीजीसीएने वैमानिक प्रशिक्षणासाठी रेडबर्डला काही नियम घालून देत परवानगी दिली आहे. त्यामुळे काही बदल करून घेत येत्या काही दिवसांत वैमानिक प्रशिक्षण पुन्हा एकदा सुरू होणार आहे.