ओटवणे । प्रतिनिधी
कारीवडे गावचे ग्रामदैवत श्री देवी कालिका देवस्थानचा वार्षिक जत्रोत्सव गुरूवारी २८ डिसेंबर रोजी होणार आहे. भाविकांच्या नवसाला पावणारी आणि माहेरवाशिणीची पाठीराखी अशी कालिका देवीची ख्याती असल्याने या जत्रोत्सवासाठी भाविकांची अलोट गर्दी होते.यानिमित्त मंदिरात सकाळी धार्मिक कार्यक्रम आटोपल्यानंतर कालिका देवीला भरजरी वस्त्र व सुवर्ण अलंकारांसह आकर्षक फुलांनी सजविण्यात येणार आहे. त्यानंतर देवस्थानच्या मानकऱ्यांच्या उपस्थितीत देवीची मानाची ओटी भरल्यानंतर श्रींच्या दर्शनासाठी रात्री उशिरापर्यंत भाविकांची गर्दी होणार आहे.यानिमित्त रात्री सवाद्य पालखी मिरवणूकीनंतर उशिरा आरोलकर दशावतार कंपनीचे नाटक होणार आहे.भाविकांनी कार्यक्रमाचा लाभ घ्यावा असे आवाहन देवस्थान कमिटीचे अध्यक्ष बाबाजी गावकर आणि देवस्थान मानकरी दादा गावकर तसेच कारीवडे ग्रामस्थांनी केले आहे.
