कुत्र्यांच्या निर्बिजीकरणासाठी मनपाला फेरनिविदा काढण्याची वेळ

बेळगाव : शहरातील भटक्या कुत्र्यांच्या निर्बिजीकरणासाठी ठेकेदार मिळत नसल्याने महानगरपालिकेच्या आरोग्य विभागावर दुसऱ्यांदा निविदा काढण्याची नामुष्की ओढवली आहे. संबंधित ठेकेदाराकडून ऑनलाईन निविदा मागविण्यात आली असून निविदा दाखल करण्याची 23 एप्रिल ही शेवटची तारीख आहे. त्यामुळे यावेळच्या निविदेला तरी प्रतिसाद मिळणार का? हे मात्र पहावे लागणार आहे. शहर आणि उपनगरात भटक्या कुत्र्यांचा प्रश्न ऐरणीवर आला आहे. कुत्र्यांची संख्या मोठ्या प्रमाणात वाढली असल्याने कुत्र्यांच्या कळपाकडून नागरिकांचा चावा घेतला जात आहे. त्यामुळे नागरिक घराबाहेर पडण्यासदेखील घाबरत आहेत. वारंवार या ना त्या ठिकाणी कुत्र्यांच्या हल्ल्याच्या घटना घडत आहेत. यापूर्वी कुत्र्यांच्या निर्बिजीकरणाचा ठेका घेतलेल्या ठेकेदाराची मुदत संपली आहे. त्यामुळे महापालिकेच्या आरोग्य विभागाकडून नव्या ठेकेदाराची नियुक्ती करण्यासाठी निविदा मागविण्यात आली होती. मात्र, निविदेला प्रतिसाद न मिळाल्याने दुसऱ्यांदा निविदा काढण्याची वेळ महापालिकेवर आली आहे. व्हॉईस ऑफ व्हॉईसलेस या कंपनीकडे सध्या शहरातील भटक्या कुत्र्यांचे निर्बिजीकरण करण्याचा ठेका आहे. दुसऱ्यांदा काढलेल्या निविदेला प्रतिसाद मिळणार की नाही, हे निश्चित नसून प्रतिसाद न मिळाल्यास जुन्याच ठेकेदाराला पुन्हा हे काम मिळण्याची शक्यता आहे. कुत्र्यांचे निर्बिजीकरण करण्यास इच्छुक असलेल्या ठेकेदाराला 23 एप्रिलपर्यंत ऑनलाईन अर्ज करावे लागणार आहेत.