खेड :
तालुक्यातील खोपी-रघुवीर फाट्यानजीक येथील पोलीस निरीक्षक नितीन भोयर यांच्या नेतृत्वाखालील पथकाने गांजा वाहतूकप्रकरणी एका महिलेसह तिघांना मंगळवारी रात्री उशिरा गजाआड केले. संशयितांकडून २ किलो ४०० ग्रॅम वजनाचा गांजा व स्कॉर्पिओ व्हॅनसह एक दुचाकी साहित्य असा ३१ लाख ५६ हजार ७४७ रूपयांचा ऐवज जप्त केला. गांजा विक्रीचे सातारा ”कनेक्शन” समोर आले असून मोठे रॅकेट असण्याच्या शक्यतेने पोलिसांकडून कसून तपास केला जात आहे.
लक्ष्मण कुंदन भोरे (४०), उज्ज्वला बाळकृष्ण मेकले (३६ दोघे रा. माझगावकर माळ झोपडपट्टी, सातारा), अविनाश हरिश्चंद्र मोरे (४५ रा. उचाट-महाबळेश्वर) अशी संशयितांची नावे आहेत. स्कॉर्पिओ व्हॅनमधून (एम.एच. ०९ डी.ए. ८५५४) आलेले दोघेजण आणि दुचाकीवरुन (एम.एच. ११ डी. पी. ४२६०) आलेला एकजण संगनमताने गांजाची विक्री करणार असल्याची गोपनीय माहिती पोलिसांना मिळाली. त्यानुसार पोलिसांनी मंगळवारी सायंकाळच्या सुमारास सापळा रचला असताना तिघांनाही गांजासह रंगेहाथ पकडले. दोन्ही वाहनांची पोलिसांनी झडती घेतली असता २ किलो ८४ ग्रॅम वजनाचा व ३१ हजार १९७ रुपये किंमतीचा गांजा हस्तगत केला. पुन्हा एकदा पोलिसांनी गांजा वाहतूकप्रकरणी तिघांना जेरबंद करत गांजा वाहतुकीचे सातारा ‘कनेक्शन’ उघड केले आहे. येथील पोलिसांची पुन्हा एकदा ही मोठी कारवाई मानली जात आहे.
