तलवार बाळगणाऱ्या तिघांना माळमारुती पोलिसांकडून अटक

बेळगाव : बेकायदा तलवार बाळगणाऱ्या तिघा जणांना माळमारुती पोलिसांनी अटक केली आहे. शनिवारी ही कारवाई करण्यात आली आहे. त्यांच्याजवळून तलवार व मोटारसायकल जप्त करण्यात आल्या आहेत. अरुण रामा व्हरकेरी (वय 32) राहणार ज्योतिर्लिंग गल्ली, कणबर्गी, विक्रम कऱ्याप्पा नाईक (वय 28) राहणार मदकर गल्ली, कणबर्गी, राहुल जोतिबा उचगावकर (वय 31) राहणार सिद्धेश्वरनगर, कणबर्गी अशी अटक करण्यात आलेल्या तिघा जणांची नावे आहेत. क्रिकेट स्टेडियमजवळ मोटारसायकल अडवून तपासणी केली असता त्यांच्याजवळ तलवार आढळून आली. माळमारुतीचे पोलीस उपनिरीक्षक पी. एम. मोहिते व त्यांच्या सहकाऱ्यांनी या तिघा जणांना अटक करून शस्त्रास्त्र कायदा कलम 27(1) व कर्नाटक पोलीस कायदा कलम 97 अन्वये एफआयआर दाखल करण्यात आला आहे.