सातारा :
फलटण व लोणंद पोलीस ठाण्याच्या हद्दीत शरीराविरूद्धचे गुन्हे करणाऱ्या तीन इसमांच्या टोळीला सातारा पोलिसांनी दोन वर्षाकरीता तडीपार केले आहे. विकी उर्फ बाळु बापुराव खताळ (वय 23 वर्षे, रा. कापडगांव, ता. फलटण), शुभम उर्फ सोनु आप्पासो घुले (वय 23 वर्षे, रा. कापडगांव, ता. फलटण), सुयोग हिंदुराव खताळ (वय 27, रा. कापडगांव ता. फलटण) अशी त्यांची नावे आहेत.
पोलिसांनी दिलेली माहिती अशी, या टोळीवर दुखापत पोचवुन शिवीगाळ दमदाटी करणे, चोरी करणे असे गंभीर स्वरुपाचे गुन्हे दाखल आहेत. लोणंद पोलीस ठाण्याचे प्रभारी अधिकारी सहाय्यक पोलीस निरीक्षक सुशील भोसले यांनी या टोळीविरुध्द महाराष्ट्र पोलीस कायदा कलम 55 प्रमाणे संपूर्ण सातारा तसेच पुणे, सोलापुर जिल्हा हद्दीतुन दोन वर्षे तडीपार करण्याबाबतचा प्रस्ताव हद्दपार प्राधिकरण तथा पोलीस अधीक्षक सातारा यांच्याकडे सादर केलेला होता. या प्रस्तावाची चौकशी उपविभागीय पोलीस अधिकारी, फलटण विभाग फलटणचे राहुल धस यांनी केली होती.
या टोळीतील इसमांवर दाखल असलेल्या गुन्ह्यांमध्ये त्यांच्यावर वेळोवेळी अटक तसेच प्रतिबंधक कारवाई करुनही त्यांच्या गुन्हे करण्याच्या प्रवृत्तीत कोणताही बदल झाला नाही. या टोळीमधील इसम हे लोणंद तसेच परिसरामध्ये सातत्याने गुन्हे करीत होते. त्यांच्यावर कायद्याचा कोणताच धाक न राहिल्यामुळे फलटण तालुका परिसरातील लोकांना मोठ्या प्रमाणावर या टोळीचा उपद्रव होत होता.
हद्दपार प्राधिकरण तथा पोलीस अधीक्षक समीर शेख यांच्या समोर सुनावणी होवुन त्यांनी संपूर्ण सातारा तसेच पुणे, सोलापुर जिल्हा हद्दीतुन दोन वर्षाकरीता हद्दपारीचा आदेश पारीत केला आहे.
या कामी हद्दपार प्राधिकरणापुढे सरकार पक्षाच्या अपर पोलीस अधीक्षक डॉ. वैशाली कडुकर यांच्या मार्गदर्शनाखाली स्थानिक गुन्हे शाखेचे पोलीस निरीक्षक अरुण देवकर, पोलीस हवालदार प्रमोद सावंत, अमित सपकाळ, पोलीस कॉन्स्टेबल केतन शिंदे, महिला पोलीस कॉन्स्टेबल अनुराधा सणस, लोणंद पोलीस ठाण्याचे पोलीस हवालदार नितीन भोसले, पोलीस कॉन्स्टेबल अमोल जाधव, महिला पोलीस कॉन्स्टेबल स्नेहल कापसे यांनी योग्य पुरावा सादर केला आहे.
