पती-पत्नीसह सात महिन्यांच्या बालकाचा मृत्यू : ट्रकची कारला धडक
कारवार : यल्लापूर तालुक्यातील आरेबैल घाटात ट्रकची कारला धडक बसून झालेल्या भीषण अपघातात एकाच कुटुंबातील तिघांचा मृत्यू झाला. बुधवारी पहाटेच्या सुमारास हा अपघात झाला. यल्लापूरहून अंकोल्याकडे जाणाऱ्या ट्रकची कारला धडक बसली. या घटनेत कारमध्ये असलेले पती, पत्नी आणि त्यांच्या 7 महिन्यांच्या बालकाचा जागीच मृत्यू झाला. या अपघातात एक जण गंभीर जखमी झाला आहे. श्रीकांत रेड्डी (वय 37), त्यांची पत्नी चैत्रा आर. (वय 31) आणि त्यांचा 7 महिन्यांचा मुलगा श्रीहान अशी अपघातातील मृतांची नावे आहेत. ते सर्वजण कोप्पळ जिल्ह्यातील आहेत. फिरण्यासाठी ते कारमधून आले होते. अंकोल्याहून हुबळीच्या दिशेने निघाले होते. यावेळी यल्लापूरहून अंकोल्याच्या दिशेने जाणाऱ्या ट्रकने आरेबैल घाटाच्या उतारावर ओव्हरटेक करण्याच्या प्रयत्नात समोरून येणाऱ्या कारला ठोकरल्यामुळे ही दुर्घटना घडली. यल्लापूर पोलिसांनी घटनास्थळी भेट देऊन पाहणी केली. याप्रकरणी ट्रकचालक प्रशांत कुंभार याच्याविरुद्ध पोलीस ठाण्यात गुन्हा दाखल करण्यात आला आहे.
