दरोडा, चोरी, घरफोडीत होते सक्रिय
प्रतिनिधी/ उंब्रज
उंब्रज पोलीस ठाण्याच्या हद्दीतील दरोडा, जबरी चोरी, घरफोडी, वाहनांची जाळपोळ करणाऱया तिघा जणांच्या टोळीवर तडीपारीची कारवाई करण्यात आली आहे. उंब्रज पोलीस ठाण्याचे सहाय्यक पोलीस निरीक्षक अजय गोरड यांनी संशयितांविरोधात तडीपारीचा प्रस्ताव सादर केला होता. त्यास पोलीस प्रमुखांनी आज मान्यता दिली आहे.
यामध्ये टोळीचा प्रमुख शाहीद ऊर्फ सोन्या शब्बीर मुल्ला (वय 28), शाहरुख शब्बीर मुल्ला (वय 29, दोघे रा. कोणेगाव ता. कराड), अमित अंकुश यादव (वय 36, रा. कवठे, ता कराड) यांना जिल्हय़ातून दोन वर्षांसाठी तडीपार करण्यात आले आहे.
याबाबत उंब्रज पोलीस ठाण्याचे सहाय्यक पोलीस निरीक्षक अजय गोरड यांनी महाराष्ट्र पोलीस अधिनियम 55 अन्वये प्रस्ताव सादर केला होता. सदर प्रस्तावातची चौकशी कराडचे उपविभागिय पोलीस अधिकारी डॉ. रणजित पाटील यांनी केली. दरोडा, जबरी चोरी, घरफोडी, वाहनांची जाळपोळ अशा घटनांमध्ये गुन्हे दाखल असताना तसेच यापूर्वी प्रतिबंधक कारवाई करुनही या टोळीच्या संशयित हालचालीस प्रतिबंध झाला नाही. त्यांच्या कृत्यांमुळे सर्वसामान्य नागरिकांचे आर्थिक व शारीरिक नुकसान झाले आहे. संशयितांना कायद्याचा धाक नसून ते बेकायदेशीर कारवाया करीत आहेत. त्यांना सुधारण्याची संधी देऊनही त्यांचे वर्तनात सुधारणा झाली नव्हती. जनतेमधून त्यांच्यावर कडक कारवाई करण्याची मागणी होत होती. या अनुषंगाने हद्दपार प्राधिकरण तथा पोलीस अधीक्षक समीर शेख यांच्याकडे प्रस्ताव सादर करण्यात आला. त्यांनी या प्रस्तावास मान्यता देऊन दोन वर्षाकरीता संशयितांना सातारा जिल्हा हद्दीतून हद्दपारीचा आदेश केला आहे.
दरम्यान 19 नोव्हेंबर 2022 पासून सात उपद्रवी टोळय़ांमधील 19 इसमांना तडीपार करण्यात आल्याचे पोलिसांकडून सांगण्यात आले. हद्दपार प्राधिकरणापुढे सरकार पक्षाचे वतीने अप्पर पोलीस अधीक्षक बापू बांगर यांच्या मार्गदर्शनाखाली स्थानिक गुन्हे शाखेचे पोलीस निरीक्षक अरुण देवकर, स्थानिक गुन्हे शाखेचे पोलीस उपनिरीक्षक मधुकर गुरव, प्रमोद सावंत, केतन शिंदे, अनुराधा सणस यांनी योग्य पुरावा सादर केला. या कारवाईचे सर्व स्तरातून समाधान व्यक्त होत आहे.
