आचरा- मारुतीघाटी रस्ता येथील घटना
पत्ता विचारण्याचा बहाणा करत चोरट्यांनी घरात केला प्रवेश
आचरा प्रतिनिधी
आचरा येथील मारुतीघाटी रस्त्यालगत असलेल्या वयोवृद्धाच्या घरात पत्ता विचारण्याचा बहाणा करून घरात घुसलेल्या चोरट्यांनी वयोवृद्धाला लुटल्याची घटना मालवण तालुक्यातील आचरा गावात घडली आहे. वृद्धाला धाक दाखवत वृद्धाच्या अंगावरील सोन्याची चेन, हातातील अंगठी ,घरातील रोख रक्कम घेऊन वृद्धाच्या घराचा दर्शनी भागाचा दरवाजा बाहेरून कडी लावून बंद करत चोरटे पसार झाले. ही घटना रविवारी रात्री साडेसात वाजण्याच्या सुमारास घडली आहे. घटनेची माहिती मिळाल्यानंतर आचरा पोलीस ठाण्याचे सहाय्यक पोलीस निरीक्षक अनिल व्हटकर दाखल झाले होते. चोरट्यांचा माग घेण्यासाठी सोमवारी डॉगस्कॉड, तसेच ठसेतज्ञही दाखल झाले होते.
पत्ता विचारण्याचा बहाणा करत चोरटे घरात घुसले
आचरा मारुतीघाटी येथील रस्त्यानजिक असलेल्या घरात वयोवृद्ध मारुती वामन वाडेकर हे एकटेच राहतात .नेहमीप्रमाणे ते आपल्या घरात टीव्हीवर बातम्या बघत बसले होते. रविवारी साडेसात वाजण्याच्या सुमारास त्यांचे बंद दार कोणीतरी ठोठावले. कोण बाहेर आलय हे बघण्यासाठी त्यांनी अर्धवट दार उघडून बघितले असता दोन इसम उभे होते. त्यांनी नाना पाटेकरचा बंगला कुठे आहे अशी विचारणा केली . आम्हाला बाहेर येऊन पत्ता सांगा असे सांगू लागलेत मात्र वाडेकर हे बाहेर येत नाहीत असे बघून त्या दोन चोरट्यांनी वाडेकर यांना जोरदार धक्का देत आत ढकलून घरात प्रवेश केला .व त्यांच्या गळ्यातील सोन्याची चैन, हातातील अंगठी हुसकावून घेतली. त्यांना धाक दाखवत घरातील पैसेही देण्यास भाग पाडले. घरात खोल्यांमध्ये शोधाशोध करत त्यांना ढकलून देत घराचे दर्शनी भागाचा दरवाजा बाहेरून बंद करत चोरटे पसार झालेत. या घटनेनंतर वाडेकर यांनी आपल्या ओळखीच्या व्यक्तींना कॉल करत झालेली घटना सांगून याची खबर आचरा पोलिसांना दिली.आचरा पोलिसांनी दिलेल्या माहितीनुसार वयोवृद्ध वाडेकर यांची चोरट्यांनी रुपये 14000 किंमतीची सुमारे दहा ग्रॅम वजनाची सोन्याची साध्या डिझाईनची चैन, रुपये 5000 किंमतीची सोन्याची खड्याची डिझाईन मध्ये मडवलेली अंगठी, घरातील अंदाजित 5000 ची रोख रक्कम असे सर्व मिळून सुमारे 24000 किंमतीच्या मुद्देमालाची चोरी झाली असल्याचे सांगितले.
ठसेतज्ञ, श्वानपथकला करण्यात आले होते पाचारण
आचरा पोलिसांनी चोरीची घटना घडल्यानंतर तपासाची सूत्रे हाती घेतली होती. वयोवृध्द्धाला घरात घुसून लुटणारे दोन चोरटे हे बुरखा घालून दाखल झाले होते. परंतु घरात प्रवेश करताना त्यानी दर्शनीदार व इतर वस्तुंना हात लावलेला होता. त्याचा माग मिळावा म्हणून सोमवारी सकाळी ठसेतज्ञ, श्वानपथकला पाचारण करण्यात आले होते. ठसेतज्ञ यांनी घरातील दारावरील व इतर वास्तुवरील ठशांचे नमुने घेतले आहेत. आचरा पोलिस ठाण्याचे सहाय्यक पोलीस निरीक्षक अनिल व्हटकर यांनी तपासाची सूत्रे स्वतःकडे घेतली असून फिर्यादी मारुती वामन वाडेकर यांच्या फिर्यादी नुसार अज्ञात दोन चोरट्यांवर कलम 392,451,342, प्रमाणे गुन्हा दाखल केला असून पु ढील तपास चालू आहे.
