सम्राट क्लब उसगांवतर्फे रंगभूमीदिन साजरा

उसगांव : सम्राट क्लब उसगांवतर्पे गोमंत रंगभूमीदिन साजरा करण्यात आला. यानिमित्त उसगावातील ज्येष्ठ भजनी कलाकार विनोद भगवंत नाईक यांचा सत्कार करण्यात आला. कार्यक्रमाला प्रमुख पाहुणे म्हणून ज्येष्ठ रंगकर्मी व राज्य पुरस्कार विजेते गुरुदास गाड उपस्थित होते. त्यांच्याहस्ते विनोद नाईक यांचा शाल, श्रीफळ, पुष्पगुच्छ व स्मृतिचिन्ह भेट देऊन सत्कार करण्यात आला. यावेळी गुरुदास गाड म्हणाले, यशाचा मार्ग हा नेहमीच संघर्षाचा व खडतर असतो. आपले ध्येय गाठण्यासाठी साधना व कठोर परिश्रम घ्यावे लागतात. त्यागी वृत्ती, समर्पित भावना व निस्वार्थीपणा यामुळे आपण इतरापेक्षा वेगळे वाटतो व अशा व्यक्तीची समाज दखल घेतो. विनोद नाईक यांनी, आपल्या जन्मभूमीत व कर्मभूमीत होणाऱ्या सत्काराला जास्त मान व महत्त्व असल्याचे सांगितले. व्यासपीठावर सम्राट क्लब उसगावच्या अध्यक्ष समीक्षा नाईक, सचिव कल्पना गावडे व इतर पदाधिकारी तसेच संचालक मंडळ उपस्थित होते. समीक्षा नाईक यांनी स्वागत केले. सूत्रसंचालन उमेश गावणेकर यांनी तर भक्ती गांवकर यांनी सत्कारमूर्तीच्या कार्याचा परिचय करून दिला. कल्पना गावडे यांनी आभार मानले.