भाविकांच्या स्वागतासाठी पेडणे सज्ज
प्रतिनिधी/ पेडणे
लाखो भाविकांचे श्रद्धास्थान म्हणून प्रसिद्ध असलेली पेडण्याची पुनव आज रविवार दि. 9 रोजी साजरी होणार असून भाविकांच्या स्वागतासाठी पेडणे सज्ज झाले आहे.
पेडणेच्या पुनव उत्सवात कुठल्याही प्रकारचा व्यत्यय तसेच अनुचित प्रकार घडू नये, यासाठी सुमारे 150 पोलिसांचा बंदोबस्त ठेवण्यात येणार आहे, अशी माहिती पेडणे पोलीस निरीक्षक दत्ताराम राऊत यांनी दिली. यात वाहतुकीच्या समस्या सोडविण्यासाठी सुमारे 80 पेक्षा जास्त पोलीस तैनात करण्यात येणार असल्याची माहिती वाहतूक पोलिसांनी दिली.
भगवती मंदिर परिसर फुलला
पुनवेसाठी विविध प्रकारचे स्टॉल, विविध प्रकारची दुकाने मंदिर परिसरासह आसपास मांडण्यात आली आहेत. खेळणी, खाजे, भांडय़ांची दुकाने, फुले विपेत्यांमुळे मंदिर परिसर फुलून गेला आहे. श्री भगवती मंदिरावर आकर्षक विद्युत रोषणाई करून मंदिर सजवलेले आहे. कोटकरवाडा ते पेडणे बाजारपेठेत विद्युत रोषणाईद्वारे कमानी सजविल्या आहेत. बाजारपेठेतही भगव्या झेंडे लावून तसेच मंदिर परिसरात शुभेच्छा देणारे फलक विविध राजकीय पक्षांनी लावल्याने वातावरण निर्मिती झाल्याचे चित्र आहे.
लाखो भाविकांचे श्रद्धास्थान असलेली पेडण्याचा सुप्रसिद्ध दसरा उत्सव व पुनव हा घटस्थापनेपासून सुरू झालेला आहे. या उत्सवाचा प्रमुख भाग म्हणजे कोजागरी पौर्णिमेला लागूनच साजरी होणारी पूनव यंदा रविवार दि. 9 रोजी साजरी होत आहे. यासाठी देवस्थान समितीचे पदाधिकारी तसेच विविध आस्थापनांचे मालक आणि भाविक सज्ज झाले आहेत.
देव रवळनाथ व देव भूतनाथ यांची तरंगे ही कोटकरवाडा येथे भगवती मंदिर व तेथून आदिस्थान देवाचा मांगर येथे सध्या ठेवण्यात आली आहेत. या ठिकाणी सुवासिनी तसेच भाविक महिला मोठय़ा संख्येने जाऊन श्री देव रवळनाथ आणि श्री देव भूतनाथ देवाच्या तरंगाचे दर्शन घेऊन आशीर्वाद घेत आहेत. श्री भगवती मंदिरातही मोठय़ा संख्येने सुवासिनी महिला देवीची ओटी भरण्यासाठी येत आहेत.
पुनवेसाठी येणाऱया भाविकांच्या वाहनांची पार्किंग व्यवस्था ही कदंबा बसस्थानक अंडर ग्राऊंडवर तसेच पेडणे तालुका भागशिक्षणाधिकारी कार्यालय मैदान, पेडणे न्यायालय बाजूच्या परिसरात करण्यात येणार आहे, अशी माहिती पेडणे वाहतूक पोलिसांनी दिली.
