महाराष्ट्र मंदिर महासंघाचे समन्वयक सुनिल घनवट यांची माहिती
फोंडा : महाराष्ट्र मंदिर न्यास परिषदेत महाराष्ट्र मंदिर महासंघाची स्थापना झाल्यापासून मंदिर संस्कृतीचे रक्षण करण्यासाठी केवळ चार महिन्यात महाराष्ट्रातील 131 मंदिरांमध्ये वस्त्रसंहिता लागू करण्यात आली आहे. आता मंदिर परिसर स्वच्छ आणि सात्विक बनावा यासाठी तो ‘मद्य-मांस मुक्त’ करण्यासाठी लढा दिला जाईल, असा निर्णय महाराष्ट्र मंदिर महासंघाच्या गाभा समितीच्या बैठकीत घेण्यात आल्याची माहिती महाराष्ट्र मंदिर महासंघाचे समन्वयक सुनील घनवट यांनी दिली. रामनाथी येथे सुऊ असलेल्या अखिल भारतीय हिंदू राष्ट्र अधिवेशनात ते बोलत होते. मंदिर सुप्रबंधन, मंदिर संरक्षण आणि मंदिर सरकारीकरण व अतिक्रमणातून मुक्ती आदी विविध विषयांवर चर्चा आणि विचारमंथन करण्यात आले.
श्री. घनवट पुढे म्हणाले, विविध चित्रपटांचे चित्रीकरण देशभरातील पौराणिक, ऐतिहासिक मंदिरांच्या परिसरात होते. या चित्रीकरणाच्या कालावधीत मंदिरांचे पावित्र्य, मंदिरातील वस्त्रसंहिता, तसेच मंदिर परिसरातील नियम यांचे पालन होत नाही. या नियमांचे पालन होण्यासाठी विविध मंदिरांना निवेदने देऊन त्यासाठी प्रयत्न केले जाणार आहेत. तसेच जिल्हा पातळीपासून ते गावपातळीपर्यंत पुजारीसंपर्क अभियान राबवण्याचा विचार आहे. यातून मंदिर-पुजारी यांचे संघटन करण्याचा निर्णय या बैठकीत घेण्यात आला. सन 1995 मध्ये वक्फ बोर्डाची स्थापना झाली. त्यांच्या कर्मचाऱ्यांना ‘पब्लिक सर्व्हंट चा दर्जा देण्यात आला आहे. त्याच धर्तीवर सरकारने हिंदू मंदिरे आणि तीर्थक्षेत्रे यांचेही हिंदू बोर्ड स्थापन करावे आणि त्यांनाही विशेष सुविधा द्याव्यात. मंदिरांचे धन मंदिरांसाठी किंवा हिंदु धर्मासाठीच वापरण्यात यावे. भारतातील सेक्युलर सरकार केवळ हिंदूंची मंदिरे बळकावून त्यातील धन घेण्याचा किंवा मंदिरातील प्राचीन परंपरा पालटण्याचा प्रयत्न करतात. इतर धार्मिक स्थळांबाबत हे होत नाही. त्यामुळे सरकारने देशातील सर्व मंदिरे सरकारीकरणातून मुक्त करावीत, अशी मागणीही श्री. घनवट यांनी यावेळी केली. या बैठकीसाठी गोमंतक मंदिर महासंघाचे सचिव जयेश थळी, महाराष्ट्रातील ज्योर्तिलींग श्री भिमाशंकर देवस्थानचे अध्यक्ष अॅङ सुरेश कौदरे, विदर्भ देवस्थान समितीचे सचिव अनुप जयस्वाल, महाराष्ट्र व गोवा बार कौन्सिलचे माजी अध्यक्ष अॅङ भरत देशमुख, मंगळग्रह सेवा संस्थानचे शरद कुलकर्णी, नगर येथील श्री भवानीमाता मंदिराचे अॅङ अभिषेक भगत, नागपूर येथील श्री बृहस्पती मंदिराचे विश्वस्त रामनारायण मिश्र आणि संकटमोचन पंचमुखी हनुमान मंदिराचे दिलीप कुकडे यासह चाळीस प्रतिनिधी उपस्थित होते.
