सांखळी पालिका नगरसेवकांचा उद्या शपथग्रहण सोहळा

साखळी : सांखळी नगरपालिकेच्या नगराध्यक्ष व उपनगराध्यक्षपदाची निवडणूक प्रक्रिया व सर्व नवनिर्वाचित नगरसेवकांचा शपथग्रहण सोहळा मंगळवार दि. 16 मे रोजी सकाळी सांखळी नगरपालिका सभागृहात होणार आहे. परंतु सध्या सांखळीत सर्वत्र चर्चेचा विषय बनलेल्या नगराध्यक्ष व उपनगराध्यक्ष पदांवर कोणाची वर्णी लागणार याचे उत्तर अद्याप सापडत नसले तरी नगराध्यक्ष पदावार नगरसेविका रश्मी देसाई व उपनगराध्यक्षपदावर आनंद काणेकर यांची सर्वप्रथम वर्णी लागणार असल्याची माहिती मिळाली आहे. मंगळवारी सकाळी होणाऱ्या या निवडणूक प्रक्रियेसाठी आज सोम. दि. 15 रोजी या दोन्ही पदांसाठी अर्ज भरून ते सादर करण्यासाठी मुदत दिली जाणार आहे. सांखळीची नगरपालिका निवडणूक ही यावेळी बरीच लक्षवेधी व प्रतिष्ठेची होती. तर निकालही तसा लक्षवेधीच व धक्कादायक ठरला. अद्याप भाजपतर्फे नगराध्यक्ष व उपनगराध्यक्ष या दोन्ही पदांसाठी नियुक्त करण्यात आलेल्या नगरसेवकांच्या नावांची अधिकृतपणे घोषणा झालेली नाही. परंतु सूत्रांकडून मिळालेल्या माहितीनुसार, नगराध्यक्ष पदासाठी अनुभवी व जेष्ठ नगरसेविका रश्मी देसाई यांची सर्वप्रथम वर्णी निश्चित झाली आहे. तर उपनगराध्यक्ष पदासाठी जेष्ठ भाजप कार्यकर्ते तथा दुसऱ्या वेळा निवडून आलेले आनंद काणेकर यांची निवड होऊ शकते, अशी माहिती मिळाली आहे. भाजपने मतदान झालेल्या सर्व दहाही प्रभागांमध्ये निर्विवाद वर्चस्व राखत ही नगरपालिका एकहाती आपल्याकडे खेचून आणली. बारा सदस्यीय या नगरपालिकेवर एक बिनविरोध व दहा उमेदवार मतदानातून निवडून आणत अकरा नगरसेवकांचे भक्कम बळ प्राप्त केले. त्यामुळे या नगरपालिकेवर भाजपची एकहाती सत्ता स्थापन झाली आहे.