दिवसभर वातावरणात गारठा : पारा 16 अंशावर : हुडहुडी वाढण्याचा अंदाज
कोल्हापूर :
गेल्या आठ ते दहा दिवसापासून गायब झालेल्या थंडीचे पुन्हा आगमन झाले आहे. शुक्रवारी पहाटे साधारण धुके पसरले होते. सकाळपासूनच वातावरणात प्रचंड गारठा जाणवत होता. दिवसभर वातावरण निरभ्र असले तरी हवेत गारठा होता. वातावरणात चांगलीच हुडहुडी वाढत असुन पुढील आठवड्यात थंडीचा कडाका आणखी वाढणार असल्याचा अंदाज हवामान विभागाने व्यक्त केला आहे.
थंडी वाढत असुन सर्दी, ताप, खोकला व घशाचे रूग्ण वाढत आहेत. व्हयरल इन्फेक्शन वाढत असुन लहान मुले, वृद्धांसह दमा, अस्थमा, फुफुसाचे आजार असलेल्यांनी विशेष काळजी घ्यावी, गरम पदार्थांचे सेवन करावे, कोणतेही लक्षण दिसताच तज्ञांकडून उपचार घ्यावे, असा सल्ला डॉक्टरांनी दिला आहे.
मागील आठवड्यात थंडी गायब होऊन वातावरणात कमालीचा उष्मा जाणवत होता. त्यातही ढगाळ वातावरणासह काही काळ पावसानेही हजेरी लावली होती. त्यामुळे उन्हाचा कडाका आणखी वाढला होता. मात्र मागील दोन दिवसापांसून थंडी हळुहळु वाढू लागली आहे. शुक्रवारी दिवसभर ऊन असले तरी हवेत गारठा हेंता. सायंकाळनंतर गारठा वाढत गेला. रात्री वाढत्या थंडीमुळे काही भागात पुन्हा शेकोट्या पेटू लागल्या आहेत.
गुरूवार दि.12 रोजी किमान तापमान 17 अंश डिग्रीसेल्सियस तर कमाल तापमान 30 अंश डिग्रीसेल्सियसची नोंद करण्यात आली. शुक्रवार दि. 13 रोजी किमान तापमानात एका अंशाने घट होऊन तापमान 16 अंशावर पोहचले होते. पुढील आढवड्यात किमान तापमानात घट होणार असुन थंडीचा कडाका वाढणार असल्याचा अंदाज व्यक्त केला जात आहे.
अशी असेल तापमानाची सरासरी (डिग्री सेल्सियसमध्ये)
वार किमान कमाल
शुक्रवार 16 अंश 30 अंश
शनिवार 15 अंश 30 अंश
रविवार 14 अंश 31 अंश
सोमवार 16 अंश 30 अंश
मंगळवार 16 अंश 31 अंश
