पुणे / प्रतिनिधी :
दहशतवादी कारवायाप्रकरणी एटीएसने अटक केलेल्या चार दहशतवाद्यांच्या पोलीस कोठडीत न्यायालयाकडून 11 ऑगस्टपर्यंत वाढ करण्यात आली आहे. संबंधित चार दहशतवादी ‘इसिस’ आणि ‘अल सुफा’ या बंदी घातलेल्या संघटनेशी संबधित असून, देशभरात बॉम्बस्फोट घडविण्याचा त्यांचा कट एटीएसने केलेल्या चौकीतून उघडकीस आल्याची माहिती सूत्रांकडून देण्यात आली.
दुचाकी चोरण्याच्या प्रयत्नात असलेल्या महंमद युनूस महंमद याकूब साकी (वय 24) आणि महंमद इम्रान महंमद युसूफ खान (वय 23, दोघे रा. चेतना गार्डन, मीठानगर, कोंढवा, मूळ रतलाम, मध्य प्रदेश) यांना कोथरूड येथे पोलिसांनी अटक होते. अधिक तपासात ते एनआयए शोध घेत असलेले दहशतवादी असल्याचे स्पष्ट झाले. या दोघांचा ताबा एटीएसने घेतल्यानंतर संबंधित दहशतवाद्यांनी पुणे, कोल्हापूर आणि सातारा येथील जंगलात बॉम्बस्फोट चाचणी केल्याचे उघडकीस आले. या दोघांना पुण्यातील कोंढवा भागात राहण्यास खोली देणारा अब्दुल कादीर दस्तगीर पठाण (वय 32, रा. कोंढवा) याला तसेच आर्थिक मदत करणारा रत्नागिरी येथील मेकॅनिकल इंजिनीअर सिमाब नसरुद्दीन काझी (वय 27) यालाही एटीएसकडून अटक करण्यात आली. या दहशतवाद्यांनी पुण्यासह काही शहरात घातपाताचा कट आखल्याचे तपासात निष्पन्न झाले आहे. या कटात झुल्फिकार अली बडोदावाल्या याचाही सहभाग निष्पन्न झाल्यावर त्यालादेखील एटीएसने ताब्यात घेतले आहे.
झुल्फिकार अली बडोदावाला याने मोहम्मद खान आणि मोहम्मद साकीला पठाण व काझीच्या माध्यमातून दहशतवादी कारवाईसाठी आर्थिक मदत केल्याचे समोर आले आहे. त्यामुळे एटीएसने त्याला एनआयच्या गुन्हय़ातून वर्ग करून घेतले आहे. इसिसच्या दहशतवादी कारवायांसाठी तरुणांना जाळय़ात ओढण्यात महाराष्ट्रातील गट सक्रिय होता. याप्रकरणी एनआयएच्या पथकाने बडोदावाला याच्या चार साथीदारांना अटक केली होती. त्यांची पोलीस कोठडीची मुदत शनिवारी संपुष्टात आल्यावर त्यांना विशेष अतिरिक्त न्यायाधीश व्ही. आर. कचरे यांच्या न्यायालयात दहशतवादविरोधी पथकाकडून हजर करण्यात आले. या वेळी न्यायालयाने संबंधित आरोपींना पोलीस कोठडी सुनावली. सरकारी पक्षातर्फे ऍड. विजय फरगडे, तर बचाव पक्षातर्फे ऍड. यशपाल पुरोहित यांनी युक्तिवाद केला.
फरार शाहनवाजचे छायाचित्र जारी
दरम्यान, कोथरूड भागात पकडलेल्या महंमद साकी व महंमद खान दोन दहशतवाद्यांना बॉम्ब तयार करण्याचे साहित्य उपलब्ध करून देणाऱ्या त्यांच्या फरार साथीदाराच्या शोधासाठी दहशतवाद विरोधी पथकाने (एटीएस) देशभरात तपास सुरू केला आहे. देशातील वेगवेगळय़ा भागात एटीएसने पथके पाठविली आहे. मोहम्मद शहनवाज अल सफा (वय 31) असे त्याचे नाव असून, राष्ट्रीय तपास यंत्रणेने (एनआयए) जयपूर बॉम्बस्फोट प्रकरणात फरार घोषित केले आहे. पसार झालेला दहशतवादी शाहनवाज याच्या शोधासाठी अन्य राज्यातील तपास यंत्रणांचीही मदत घेण्यात आली आहे. त्याचा ठावठिकाणा न लागल्याने एटीएसकडून शाहनवाजचे छायाचित्रही प्रसारित करण्यात आले आहे.
डॉ. अदनान अली आणि बडोदावाला नातेवाईक
‘इसिस’ या आंतरराष्ट्रीय दहशतवादी संघटनेच्या कारवायांमध्ये तरुणांना ओढण्यात महाराष्ट्रातील गट सक्रिय होता. त्याबाबतची माहिती राष्ट्रीय तपास यंत्रणेला (एनआयए) मिळाल्यानंतर दोन महिन्यांपूर्वी मुंबई, ठाणे, तसेच पुण्यातून चौघांना अटक करण्यात आली आहे. मुंबईतून तबिश नासेर सिद्दिकी, पुण्यातील जुबेर नूर मोहम्मद शेख, अबू नुसैबा तसेच ठाण्यातील शरजील शेख व झुल्फिकार अली बडोदावाला यांना अटक करण्यात आली आहे. एनआयएने गेल्या आठवडय़ात पुण्यातील डॉ. अदनान अली सरकार यालाही अटक केली आहे. एटीएसने अटक केलेल्या दहशतवाद्यांच्या संपर्कात असल्याप्रकरणी बडोदावाला याला नुकतेच मुंबईतील ऑर्थर रोड कारागृहातून ताब्यात घेण्यात आले. बडोदावाला आणि डॉ अदनान अली दोघे नातेवाईक असल्याची माहितीही तपासात मिळाली आहे.
