कारवारमधील काँग्रेसच्या ‘रोड शो’त काणकोणच्या कार्यकर्त्यांचा सहभाग

काणकोण : कर्नाटक विधानसभा निवडणुकीत कारवार मतदारसंघात काय घडते याकडे कारवार, अंकोलाप्रमाणेच कारवारच्या सीमेवर असलेल्या काणकोणवासियांचे देखील लक्ष लागून राहिले आहे. गोव्यातील भाजपाचे मुख्यमंत्री, मंत्री, पक्षाचे ज्येष्ठ नेते कर्नाटकातील विविध भागांत प्रचारासाठी तळ ठोकून राहिलेले असतानाच कणकोणच्या काँग्रेस कार्यकर्त्यांनी देखील कारवार मतदारसंघातील काँग्रेसचे उमेदवार सतीश सैल यांच्या समर्थनार्थ नुकत्याच आयोजित केलेल्या ‘रोड शो’मध्ये भाग घेतला.   काणकोण आणि कारवारचे पूर्वीपासूनच दृढ संबंध राहिलेले असून श्रीस्थळ येथील श्री मल्लिकार्जुन देवाचे कित्येक महाजन, कुळावी, भाविक कारवार प्रांतात वास्तव्य करून आहेत. दरवर्षी होणाऱ्या विविध उत्सवांस हे लोक आवर्जुन उपस्थित राहत असतात. स्वत: सतीश सैल यांचे कित्येक नातेवाईक काणकोणला आहेत. या पार्श्वभूमीवर सतीश सैल यांच्या समर्थनार्थ कारवार प्रांतात जो रोड शो काढण्यात आला त्यात काँग्रेसच्या जनार्दन भंडारी यांच्या नेतृत्वाखाली कार्यकर्त्यांनी भाग घेतला. दरम्यान, 10 रोजी होणार असलेल्या निवडणुकीमुळे माजाळीच्या सीमावर्ती भागानजीक असलेली काणकोणातील पोळेपर्यंतची दारूची दुकाने बंद ठेवावीत, असा आदेश निर्वाचन आयोगाने काढला आहे.