वार्ताहर /कंग्राळी बुद्रुक
गावचे जागृत ग्रामदैवत श्री कलमेश्वर मंदिरामध्ये प्रतिवर्षाप्रमाणे परंपरेनुसार सोमवारी घटस्थापना दिवसापासून नवरात्रोत्सवाला मोठ्या उत्सवामध्ये प्रारंभ करण्यात आला. या नऊ दिवसाच्या धार्मिक कालावधीमध्ये गावामध्ये व मंदिरामध्ये धार्मीकतेचे वातावरण दिसून येते. कलमेश्वर ग्रामदैवत नवसाला पावणारे देवस्थान असल्यामुळे परंपरेनुसार नऊ दिवस गावातील बाहेरगावातील तालुक्यातील अनेक भक्त नवरात्रोत्सव कालावधीमध्ये नऊ दिवस मंदिरमध्ये अखंड नामस्मरण करत वास्तव्य करतात.हे भाविक अखंड नामस्मरण, ग्रंथवाचन भक्तीकथा वाचन आदी नवरात्र उत्सवात मग्न असतात.. नऊ दिवस दररोज रात्री 8.30 वाजता श्री कलमेश्वर देवस्थानच्या पालखीची मंदीरभोवती तीन प्रदक्षिणा घालण्यात येते. भाविक हर हर महादेव.. श्री कलमेश्वर महाराज की जय% असा जयघोष करत पालखीची प्रदक्षिणा होते. रात्री वारकरी भजनी मंडळीचा भक्तीगीताचा भजन कार्यक्रम पार पडतो. विजयादशमी दिवशी श्री कलमेश्वर देवस्थानची पालखी गावच्या पूर्वेला असलेल्या श्री सिध्देश्वर देवस्थानकडे सर्व भक्तांच्या समवेत नेली जाते. विजयादशमी दिवशी वर्षातून एकदा या पालखींची अशा रूपाने भेट घडवून आणली जाते. शेवटी पालखी श्री कलमेश्वर मंदिरकडे आल्यानंतर सर्व भक्तांच्या गाठीभेटी झाल्यावर नवरात्रोत्सव व विजयादशमी सणाची सांगता होते.
