पुणे / प्रतिनिधी :
अंगणवाडी सेविकांच्या मागण्यांबाबत सरकार सकारात्मक असून, याप्रश्नी लवकरच बैठक घेतली जाईल, असे आश्वासन राज्याच्या महिला व बालकल्याणमंत्री अदिती तटकरे यांनी मुंबई येथे दिले.
भारतीय मजदूर संघाच्या महाराष्ट्र अंगणवाडी कर्मचारी संघाच्या वतीने राज्यातील अंगणवाडी सेविकांच्या विविध मागण्यांबाबतचे निवेदन तटकरे यांना मंत्रालयात देण्यात आले. त्या वेळी त्या बोलत होत्या. अंगणवाडी सेविकांना मानधन एकत्रित व नियमितपणे मिळावे, कामगारांना पेंशन व ग्रज्युईटी मिळावी. मोबाईल चांगल्या दर्जाचे मिळावेत, रिर्चाजची रक्कम वाढविण्यात यावी, परिवर्तन निधी वाढवून मिळावा, पर्यवेक्षक भरतीमध्ये एमएसडब्ल्यूला प्राधान्य देण्यात यावे तसेच अनुभव व शिक्षण यानुसार भरती करण्यात यावी, या मागण्यांचा यात समावेश आहे. महाराष्ट्र अंगणवाडी कर्मचारी संघ (संलग्न भारतीय मजदूर संघ) अध्यक्षा सुरेखा गायकवाड यांच्या नेतृत्वाखालील शिष्टमंडळात शाकीरा सय्यद, ललिता खांदे, कविता पाथरुट, शालन कटरे आदी महिला पदाधिकाऱयांचा समावेश होता.
अंगणवाडी सेविकांच्या समस्या सोडविण्याचा प्रयत्न केला जाईल. यासंदर्भात लवकरच बैठक घेण्यात येईल. त्यात त्यांच्या मागण्यांबाबत सकारात्मक निर्णय घेतला जाईल, असे आश्वासन तटकरे यांनी दिले असल्याचे अखिल भारतीय मजदूर महासंघाचे सरचिटणीस सचिन मेंगाळे यांनी कळविले आहे.
