‘ग्लोबल चेस लीग’चे वेध सुरू

नवी दिल्ली : बुद्धिबळप्रेमींना ज्याची उत्सुकता लागून राहिली आहे त्या पहिल्या ‘ग्लोबल चेस लीग’चे वेध सुरू झालेले असून त्यात सहभागी सहा संघ नुकतेच जाहीर करण्यात आले. बुद्धिबळच्या विश्वात ही लीग क्रांती घडवून आणण्याची अपेक्षा असून संघांचे मालक खेळाडूंची निवड करून त्याची सुरुवात करतील. विश्वनाथन आनंद, डिंग लिरेन, मॅग्नस कार्लसन, इयान नेपोम्नियाच्ची, हौ यिफान, कॅटेरिना लागनो आणि इतर नामांकित खेळाडू या लीगच्या माध्यमातून एकत्र येतील. तसेच प्रतिष्ठित क्रीडा उद्योजक संघांचे मालक म्हणून पुढे आलेले आहेत. ‘यू स्पोर्ट्स’, ‘इनशुअरकोट स्पोर्ट्स’ (आयएसपीएल), पुनीत बालन समूह, त्रिवेणी इंजिनियरिंग अँड इंडस्ट्रिज लिमिटेड, चिंगारी अॅप आणि एपीएल अपोलोच्या नेतृत्वाखालील ‘एसजी स्पोर्ट्स’ हे या संघांचे मालक आहेत. ही लीग 21 जून ते 2 जुलै या कालावधीत दुबईत होणार आहे.