धर्मवीर संभाजी चौक परिसरातील घटना
प्रतिनिधी / बेळगाव
निवृत्त जवानाच्या कारची काच फोडण्यात आली आहे. गुरुवारी रात्री धर्मवीर संभाजी चौक परिसरात ही घटना घडली असून या घटनेने परिसरात खळबळ माजली आहे.
आनंदनगर, साई कॉलनी, वडगाव येथील दीपक साळुंखे हे कुटुंबीयांसमवेत केए 22 झेड 9742 क्रमांकाच्या अल्टो-800 मधून बेळगावला आले होते. धर्मवीर संभाजी चौक परिसरात गुरुवारी रात्री 8.45 च्या सुमारास त्यांनी आपली कार उभी केली होती.
रात्री कामे आटोपून 10.10 च्या सुमारास घरी परतण्यासाठी ते आपल्या कारजवळ आले. त्यावेळी हा प्रकार उघडकीस आला. दीपक यांनी कॅम्प पोलिसांना घटनेची माहिती दिली. कारमधील वस्तू चोरण्याच्या उद्देशाने काच फोडली की दहशत निर्माण करण्यासाठी समाजकंटकांनी हे कृत्य केले आहे? याचा उलगडा झाला नाही. धर्मवीर संभाजी चौक परिसरात सीसीटीव्ही कॅमेरे आहेत. यापूर्वीही या परिसरात पार्किंग केलेल्या वाहनांच्या काचा फोडून कारमधील किमती ऐवज लांबविल्याच्या घटना घडल्या आहेत. गुरुवारी रात्री उघडकीस आलेल्या घटनेने एकच खळबळ माजली आहे. पे-पार्किंग केली होती. मात्र, या घटनेवेळी संबंधित पार्किंग फी घेणारे कोणीही घटनास्थळी नव्हते. त्यामुळे वाहनांचे संरक्षण होत नसेल तर पे-पार्किंग कशासाठी, असा प्रश्न उपस्थित होत आहे.
