मालवण / प्रतिनिधी
जेष्ठ पर्यटन व्यवसायिक दामोदर तोडणकर यांनी मांडली भूमिका
मान्सून पूर्व समुद्रातील अंतर्गत हालचालींना सुरवात होत आहे. हे पाहता २६ मे पासून महाराष्ट्राच्या संपूर्ण किनारपट्टीवरील जलक्रीडा व प्रवासी होडी वाहतुकीस असलेली बंदी योग्यच आहे. असे मत मालवण येथील जेष्ठ पर्यटन व्यावसायिक दामोदर तोडणकर यांनी माहिती देताना सांगितले आहे.
मान्सून पूर्व हालचालींना समुद्रात साधारण मे अखेरीस सुरवात होते. मात्र काही दिवसांपूर्वी मोचा हे समुद्री वादळ आले होते. ते वादळ ओसरल्यावर काही दिवस समुद्री शांत ही स्थिती जाणवली. वादळ येऊन गेल्यानंतर ही स्थिती असते. याचा विचार करता समुद्र पूर्णपणे शांत आहे. असे म्हणता येणार नाही.
समुद्रातील अंतर्गत हालचाली सुरू होत आहेत. काही दिवसात पावसालाही सुरवात होईल. याचा विचार करता बंदर विभाग व संबंधित यंत्रणानी पर्यटन हंगाम बंदी कालावधीची सुरू केलेली अंमलबजावणी योग्य आहे. आम्हीही आमचे व्यवसाय बंद ठेवले आहेत. अशी भूमिका पर्यटन व्यवसायिक दामोदर तोडणकर यांनी स्पष्ट केली आहे. एकीकडे समुद्री हवामान चांगले असल्याने बहुतांश पर्यटन व्यावसायिक मुदतवाढ मागणी करत असताना तोडणकर यांनी प्रशासनाची बंदी भूमिका योग्यच असल्याचे म्हटले आहे.
