कालमणीनजीक कंटेनर घुसला जंगलात

कणकुंबी : अपघात केव्हा आणि कसा होईल हे सांगता येत नाही. रस्ता लहान असो की मोठा अपघाताला वेळ आणि काळ नसतो. अपघात वेगवेगळ्या प्रकारचे असतात. असाच विचित्र अपघात सोमवारी बेळगाव, चोर्ला, पणजी रस्त्यावरील कालमणीनजीक घडला. कंटेनर रस्ता सोडून चक्क जंगलात शंभर फूट आत गेला. पण दैव बलवत्तर म्हणून या अपघातात काहीच विपरीत घडले नाही. याबाबतची माहिती अशी की, गुजरात (सूरत) ते गोवा अशी सुमुल कंपनीचे दूध वाहतूक करणारा जीजे 21 डब्लू 3939 या क्रमांकाचा कंटेनर सोमवारी गोव्याहून गुजरातकडे जात असताना जांबोटी-कणकुंबी रस्त्यावरील कालमणी दरम्यान एका लहान वळणावर आला असता वाहनचालकाचा ताबा सुटल्याने चक्क 100 फूट जंगलात घुसला. मुख्य रस्ता पार करून लहान-मोठी झाडं व दगड धोंडे खाली घालून ट्रक जंगलात घुसला. शेवटी एका मोठ्या झाडाला जाऊन कंटेनर धडकला. कंटेनर जंगलात घुसल्याने वाहनचालक गेंधळला होता. या घटनेत वाहनचालक किरकोळ जखमी झाला आहे. सुमुल दूध कंपनीच्या दूध वाहतूक करणाऱ्या गाड्या दररोज बेळगावमार्गे सूरत ते गोवा धावत असतात.