कुडुवाडी :
मुख्यमंत्री लाडकी बहीण योजनेचे पत्नीच्या खात्यावर आलेले पैसे पत्तीराजांनी दारूवर फस्त केले. पत्नीने पतीला जाब विचारला असता सासूने विवाहितेला शिवीगाळ, दमदाटी केली तसेच पतीने लाकडाने व कोयत्याने मारहाण करून जखमी केले. ही घटना १३ मार्च रोजी रात्री लोणी (ता. माढा) येथे घडली. याबाबत विवाहिता निशा धनाजी लोंढे यांनी कुर्दुवाडी पोलिसांत फिर्याद दाखल केली आहे.
घरी लोणी (ता. माढा) येथे होळीचा सण साजरा होत असताना पतीराज हे दिवसभर घरी न थांबता परंडा येथे होते. रात्री १० वाजता दारूच्या नशेत घरी आले आणि बायकोला म्हणाले, तुझ्या लाडक्या बहिणीचे आलेले १५०० रुपये मी दारूमध्ये उडवले.
यावर विवाहितेने नवऱ्याला माझे लाडक्या बहीण योजनेचे पैसे का खर्च केले असा जाब विचारला असता पतीने जळणातील लाकडाने विवाहितेच्या पाठीवर, मांडीवर मारले. विवाहितेने सासू रुपाबाई शिवाजी लोंढे यांना बोलावून आपली तक्रार सांगितली. त्यावर सासूने उलट सुनेलाच शिवीगाळ करत हिला बघच असे म्हटल्यानंतर पतीने पत्र्याच्या शेडमधील ऊस तोडणीचा कोयता घेऊन तुला आता दाखवितोच म्हणून कोयत्याने डाव्या पायाच्या गुडघ्यावर व डाव्या हाताच्या अंगठ्याशेजारील तर्जनीवर मारून जखमी केले व तुला जिवंत सोडणार नाही, अशी धमकी दिली.
दरम्यान, दीर व नणंद यांनी येऊन भांडणे सोडवली. या भांडणात मुलगा ऋषीकेश हा देखील जखमी झाला आहे. पती धनाजी शिवाजी लोंढे व सासू रुपाबाई शिवाजी लोंढे यांच्यावर गुन्हा दाखल झाला आहे.
