93 हजार कोटींनी कमी झाले भांडवल : इन्फोसिसचे नुकसान
वृत्तसंस्था/ मुंबई
आघाडीवरच्या दहा कंपन्यापैकी 5 कंपन्यांचे बाजार भांडवल मूल्य मागील आठवड्यामध्ये 93358 कोटी रुपयांनी कमी झाले आहे. या दरम्यान आयटी क्षेत्रातील कंपनी इन्फोसिसचे बाजारमूल्य सर्वाधिक घसरणीत राहिले होते. मागच्या आठवड्यामध्ये शुक्रवारी होळीनिमित्त सुटी बाजाराला असल्यामुळे गुरुवारपर्यंतच बाजाराचे काम झाले होते. आयटी क्षेत्रातील कंपनी इन्फोसिसचे बाजारभांडवल मूल्य 44227 कोटी रुपयांनी कमी होत 6.56 लाख कोटी रुपयांवर स्थिरावले. याशिवाय टीसीएसचे बाजारभांडवल मूल्य 34801 कोटी, हिंदुस्थान युनिलिव्हर 6567 कोटी, एसबीआय 4462 कोटी आणि रिलायन्स इंडस्ट्रीजचे बाजार भांडवल मूल्य 2301 कोटी रुपयांनी कमी झाले होते.
आयसीआयसीआयचे मूल्य वाढले
दुसरीकडे खासगी क्षेत्रातील बँक आयसीआयसीआय बँक यांचे बाजार भांडवल मूल्य 25459 कोटी रुपयांनी वाढत 8 लाख 83 हजार कोटी रुपयांवर पोहचले होते. एचडीएफसी बँकेचे मूल्य 12592 कोटी रुपयांनी वाढत 13.5 लाख कोटी रुपयांवर पोहोचले. आयटीसी, बजाज फायनान्स आणि एअरटेल या समभागांमध्ये विक्री दिसून आली.
चारच दिवस कामकाज
मागच्या आठवड्यात बाजारात चारच दिवस काम झाले. या 4 दिवसांमध्ये एकंदर 504 अंकांची घसरण बाजारात पहायला मिळाली. गुरुवारी सेन्सेक्स 200 अंकांनी आणि निफ्टी 73 अंकांनी घसरला होता.
