वडगाव-धामणे रस्त्यावरील ब्रीज एका बाजूने खचला

धामणे : वडगाव ते धामणे रस्त्यावरील बळ्ळारी नाल्याचे ब्रिज एका बाजुने कोसळले आहे. त्यामुळे वाहनधारकांना धोका निर्माण होवून अपघाताचे चित्र निर्माण झाले आहे. वडगाव ते धामणे या रस्त्यावर लागणारे ब्रिज जवळजवळ 50 वर्षांपूर्वीचे असून या ब्रिजचे दोन्ही बाजुचे बांधकाम फार जुने झाले असल्यामुळे ते पडत आहे. मुसळधार पावसामुळे या बळ्ळारी नाल्याला पूर आला आहे. या ब्रिजचा एका बाजूचा कडा पडला आहे. जर एखादे वाहन जरादेखील रस्त्याच्या बाजुला घेतल्यास वाहन बळ्ळारी नाल्यात पडण्याची भीती निर्माण झाली आहे. वडगाव-धामणे हा रस्ता धामणे गावचा बेळगाव शहराला जोडलेला मुख्य रस्ता असल्याने या रस्त्याने वाहनांची मोठी रहदारी असून याच रस्त्याने दिवसाला 15 ते 16 बेळगाव-धामणे-देवगणहट्टी बसच्या फेऱ्या होतात. त्याचप्रमाणे मोठी अवजड वाहने व चारचाकी, दुचाकी वाहनांची रात्रंदिवस वर्दळ सुरू असते. या ब्रिजची एक बाजू पडली असल्याने आता या ब्रिजवरती वाहनधारकांना मोठा धोका निर्माण झाला आहे. तरी वडगाव ते धामणे रस्त्यासंबंधीत वरिष्ठ अधिकाऱ्यांनी या निर्माण झालेल्या समस्येवर तातडीने विचार करून ही उद्भवलेली समस्या दूर करून वाहनधारकांना दिलासा द्यावा, अशी मागणी वाहनधारकांकडून जोर धरु लागली आहे.