निवडणुकीचे पडघम सुरु असताना मुंडके छाटलेला बकरा दिसल्याने उलट सुलट चर्चेला उधाण
आचरा प्रतिनिधी
आचरा मालवण रस्त्यालागतच्या मारुती घाटी फाट्यावर शनिवारी रात्री 10 वाजण्याच्या सुमारास एक मुंडके छाटलेला बकरा अगदी रस्त्याच्या कडेला टाकलेला दिसून आला होता. आचरा मालवण रस्ता व मारुती घाटी रस्ता असे जेथे तीन रस्ते एकत्रित होतात अशा ठिकाणी आणून टकलेला हा बकरा टाकलेला होता. या रस्त्याने ये जा करणाऱ्या वाटसरूंना हा मुंडके छाटलेला बकरा दिसून आला. बकरा टाकलेल्या ठिकाणी कोणतेही रक्ताचे डाग नसल्याने सदर बकरा दुसऱ्या ठिकाणी मारून मग टाकला असावा असा अंदाज वर्तवला जात होता.
आचरा ग्रामपंचायत निवडणुकीचे पडघम आचऱ्यात जोरात चालू आहेत. निवडणुकीचे वातावरण दिवसेंदिवस तापत आहे. मुंडके छाटलेला बकरा दिसून आल्याच्या प्रकारानंतर मात्र गावात यावरून उलट सुलट चर्चाना उत आला होता. नेहमीच आचरा मालवण रस्त्यावर रात्री उशिरापर्यंत रेलचेल, वाहतूक चालू असते अशा ठिकाणी असा प्रकार समोर आल्याने ग्रामस्थ आश्चर्य व्यक्त करत आहेत.
