ओटवणे प्रतिनिधी
विलवडे येथील १८१ व्या स्पर्धा परीक्षा मार्गदर्शन व्याख्यानात निर्धार
कोकणातील विद्यार्थ्यांमध्ये मोठ्या प्रमाणात प्रतिभा आहे. येथील युवकांना स्पर्धा परीक्षांचे योग्य मार्गदर्शन मिळून स्पर्धा परीक्षांना आत्मविश्वासाने समोरे गेल्यास आपल्या कोकणात मोठ्या प्रमाणात प्रशासकीय अधिकारी निर्माण होतील. पर्यायाने आपले गाव हे प्रशासकीय अधिकाऱ्यांचे गांव होण्यास वेळ लागणार नाही. असे प्रतिपादनमुंबई सीमाशुल्क विभागातील अनुवाद अधिकारी सत्यवान यशवंत रेडकर यांनी केले.विलवडे येथील राजा शिवाजी विद्यालयात आयोजित करण्यात आलेल्या स्पर्धा परीक्षा मार्गदर्शन व्याख्यानात सत्यवान रेडकर बोलत होते. यावेळी या व्याख्यानाचे संयोजक विलवडे सरपंच प्रकाश दळवी आणि शिक्षणप्रेमी गोपाळ सावंत, विलवडे ग्रामोन्नती मंडळ (मुंबई) या संस्थेचे माजी सरचिटणीस राजाराम दळवी, शिक्षणप्रेमी सुधीर सावंत, प्रशालेचे मुख्याध्यापक बुद्धभूषण हेवाळकर, सहाय्यक शिक्षक सुहास बांदेकर, वनसिंग पाडवी आदी उपस्थित होते.
कोकणात शासकीय कर्मचाऱ्यांचे गांव निर्माण व्हावे यासाठी सत्यवान रेडकर संपूर्ण कोकणामध्ये स्पर्धा परीक्षा मार्गदर्शन व्याख्याने घेत असून विलवडे येथील त्यांचे हे १८१ वे स्पर्धा परीक्षा मार्गदर्शन व्याख्यान होते. आपले जीवन समृद्ध आणि गतिमान होण्यासाठी तरुणांना स्पर्धा परीक्षा तसेच व्यवसाय विषयी मार्गदर्शन होणे अत्यंत महत्वाचे आहे. ही काळाची गरज ओळखून कोकण भूमिपुत्र सत्यवान रेडकर शैक्षणिक ज्ञानदान करत आहेत.यावेळी सत्यवान रेडकर यांनी कोकणातून प्रशासकीय अधिकारी घडवणारच असा निर्धार करून भविष्यातील शासकीय अधिकारी घडविण्यासाठी आपली ही एक शैक्षणिक चळवळ असल्याचे सांगितले. त्यामुळे विलवडे पंचक्रोशीतील सर्व विद्यार्थी, युवक- युवतींनी याचा लाभ घेऊन आपल्या जीवनात बदल करून यशस्वी व्हावे असे आवाहन केले.
