विद्यानगरातील ‘तो’ धोकादायक खड्डा बुजविला

बेळगाव : प्रभाग क्र. 31 मधील विद्यानगर सर्कलमध्ये पडलेला धोकादायक खड्डा बुजविण्याकडे महानगरपालिकेने दुर्लक्ष केल्याने नगरसेविका वीणा विजापुरे यांन पुढाकार घेत मनपा कर्मचाऱ्यांच्या उपस्थितीत खडी टाकून मंगळवारी सदर खड्डा बुजविला आहे. त्यामुळे नागरिकांतून समाधान व्यक्त केले जात आहे. विद्यानगर येथे रस्त्याच्या मधोमध मोठा खड्डा पडला असल्याने पावसाचे पाणी खड्ड्यात भरल्यानंतर त्याचा अंदाज येणे अवघड झाले होते. त्यामुळे दररोज लहान-मोठे अपघात घडत आहेत. पावसाळ्यापूर्वी खड्ड्यांची दुरुस्ती करावी, अशी मागणी केली जात होती. मात्र त्याकडे दुर्लक्ष केल्याने सदर खड्ड्याची व्याप्ती वाढून तो आता धोकादायक बनला होता. त्यामुळे मंगळवारी सदर खड्ड्यात खडी टाकून तो बुजविण्यात आला आहे.