वृत्तसंस्था/ नवी दिल्ली
एलॉन मस्कची ईव्ही कंपनी टेस्ला यावर्षी भारतातून 1.7 ते 1.9 अब्ज डॉलर्स (सुमारे 14.10 हजार कोटी-15.76 हजार कोटी) किमतीचे ऑटो पार्ट्स खरेदी करणार असल्याची माहिती आहे. या संदर्भातील अधिकचा तपशील केंद्रीय वाणिज्य आणि उद्योग मंत्री पियुष गोयल यांनी ऑटोमोबाईल कंपोनंट मॅन्युफॅक्चरर्स असोसिएशन ऑफ इंडियाच्या 63 व्या वार्षिक अधिवेशनाला संबोधित करताना दिला आहे.
ते म्हणाले की टेस्लाने यापूर्वी भारताकडून 1 अब्ज डॉलर्स (सुमारे 8.29 हजार कोटी) किमतीचे भाग खरेदी केले आहेत. गेल्या वर्षीच्या तुलनेत यंदा टेस्ला आपली आयात दुप्पट करणार आहे. गोयल म्हणाले की 2030 पर्यंत ग्राहकांना ईव्ही खरेदी करण्यासाठी बंधनकारक आर्थिक संरचना असेल.
टेस्लाला भारतात मॅन्युफॅक्चरिंग प्रकल्प उभारायचा आहे. मीडिया रिपोर्ट्सनुसार, टेस्ला अधिकाऱ्यांनी 17 मे रोजी भारत सरकारच्या अधिकाऱ्यांसोबत बैठक घेतली होती. या बैठकीत कंपनीने भारतात इलेक्ट्रिक कार बनवण्यासाठी मॅन्युफॅक्चरिंग युनिट स्थापन करण्याची इच्छा व्यक्त केली.
गेल्या वर्षी टेस्लाने भारतात येण्याची इच्छा व्यक्त केली होती, परंतु कंपनी आणि सरकार यांच्यात चर्चा होऊ शकली नाही. टेस्लाने सरकारला पूर्णपणे असेंबल्ड कारवरील आयात शुल्क 100 टक्क्यांवरून 40 टक्केपर्यंत कमी करण्यास सांगितले होते.
