दहशतवाद्यांकडून पुणे,सातारा,कोल्हापूरच्या जंगलात बॉम्बस्फोटाची चाचणी केल्याची धक्कादायक माहिती समोर आली आहे.दहशतवाद विरोधी पथकाने न्यायालयात सादर केलेल्या अहवालातून ही बाब समोर आली आहे. कोथरूड पोलिसांनी नाकाबंदीत पकडलेल्या दोन दहशतवाद्यांची पोलिस कोठडी संपत आल्याने दहशतवाद विरोधी पथकाने दोघांना जिल्हा व सत्र न्यायालयात हजर केले.त्यावेळी सत्र न्यायाधीश एस.व्ही.कचरे यांच्या न्यायालयाने त्यांना पाच ऑगस्टपर्यंत पोलिस कोठडी सुनावली.
पथकाने केलेल्या तपासात देशविघातक कारवाई करण्याचा उद्देश असल्याचे पेन ड्राईव्हमधून आले समोर आले आहे. तसेच दोघेही आयसिसच्या अल सुफा संघटनेशी संबंधित असल्याचे देखील समोर आले आहे. पेनड्राईव्ह मधून निघालेल्या माहितीचा ४३६ पानांचा तपास अहवाल न्यायालयात सादर करण्यात आला.
दहशतवाद विरोधी पथकाने दोन्ही आरोपींच्या घराची झडती घेतली यावेळी त्यांना इलेक्ट्रॉनिक उपकरणांसह पांढरी पावडर सापडली. ही पावडर स्फोटक असल्याचे एक्स्प्लोसिव्ह वेफर डिटेक्टर मध्ये स्पष्ट झाले आहे. पोलिसांच्या डॉग स्कॉडने देखील यासंबंधी पॉझिटिव्ह रिपोर्ट दिला आहे. ही पावडर नेमके कोणते स्फोटके आहे, त्यासाठी न्यायवैद्यक प्रयोगशाळेकडे तपासणीसाठी पाठविला असून त्याचा अहवाल येणे बाकी आहे.
