पुणे / वार्ताहर :
नोकरीच्या शोधात असलेल्या एका तरुणाला नोकरी देण्याचे आमिष दाखवून टेलिग्रामचे टास्क पूर्ण करण्यास सांगून त्याच्याकडून पावणेदहा लाख रुपये बँक खात्यावर घेत फसवणूक करण्यात आली. याप्रकरणी चंदननगर पोलीस ठाण्यात आरोपी विरोधात तक्रार दाखल करण्यात आल्याची माहिती पोलिसांनी शनिवारी दिली.
शुभम कुमार साहू (वय 28, रा. पठारेनगर, पुणे) याने अज्ञात मोबाईल क्रमांक धारक तसेच अनुनावाचे टेलिग्राम आयडी धारक यांच्या विरोधात चंदननगर पोलीस ठाण्यात फिर्याद दाखल केली आहे. 3 एप्रिल 2023 ते ऑगस्ट 2023 यादरम्यान ऑनलाइन घडलेला आहे.
पोलिसांनी दिलेल्या माहितीनुसार, शुभम साहू हा नोकरीच्या शोधात होता. यासाठी तो ऑनलाइन काम पाहत असताना त्याला संबंधित आरोपींनी संपर्क करून नोकरी देण्याचे आमिष दाखवले. टेलिग्रामवरील वेगवेगळे टास्क पूर्ण केल्यास दररोज वेगवेगळे टास्क प्रमाणे पैसे मिळतील, असे सांगून त्याला आमिष दाखवण्यात आले. त्यानुसार त्याच्याकडून पावणेदहा लाख रुपये आरोपींनी बँक खात्यावर जमा करुन घेत त्याची फसवणूक केली. याबाबत चंदननगर पोलीस ठाण्याचे पोलीस निरीक्षक यु. जानकर पुढील तपास करत आहेत.
