दसरोत्सवासाठी मंदिरे सज्ज

पणजी : राज्यात आज पारंपरिक दसरोत्सव उत्साहात तसेच भरगच्च धार्मिक व सांस्कृतिक कार्यक्रमांनिशी थाटात साजरा होणार आहे. दसरोत्सवानिमित्तच्या कार्यक्रमांसाठी राज्यातील सर्व मंदिरे सज्ज झालेली आहेत. गेले 9 दिवस चालू असलेल्या नवरात्रोत्सवाची आज दसऱ्यादिनी थाटात सांगता होणार आहे. साडेतीन मुहूर्तापैकी एक व पवित्र दिवस म्हणून दसऱ्याची ओळख आहे. आजच्या या पवित्र दिनी प्रत्येकजण आपल्या प्रवेशद्वारावर झेंडूची फुले आणि आंब्यांची पाने एकत्रित कऊन पुष्पमाळेचे मंगलतोरण बांधून दसरोत्सवाचे स्वागत करतील. आपल्याकडील वाहनाला स्वच्छ धुवून झेंडूच्या माळा बांधून व पारंपरिक पूजन कऊन दसरोत्सव साजरा करतील. शुभदिन असल्याने अनेक नव्या कार्याच्या, नव्या वास्तुच्या व अनेक व्यावसायिक आस्थापनांचे उद्घाटन आज दसऱ्यादिनी केले जात आहे. दिवसभर आज सर्वच ठिकाणी धार्मिक कार्यक्रम होणार आहेत. राज्यातील सर्वच मंदिरांना झेंडूची फुले आणि आंब्यांच्या पानांनी सजविण्यात आले आहे. अनेक गावातील मंदिरांमध्ये विविध प्रथा व परंपरेने आज दसरोत्सव साजरा होईल. दसरोत्सवानिमित्त काही ठिकाणी कुष्मांडचा (कोहळा) बळी दिला जातो. अनेक मंदिरांमध्ये सायंकाळी पालखी उत्सव तर काही मंदिरांमध्ये तरंगोत्सव होणार आहे. सायंकाळी आपट्याची पाने व शमीची पाने लुटून ‘सोने लुटण्याचा’ कार्यक्रम तर कित्येक ठिकाणी आजच्या दिनी सायंकाळी सीमोल्लंघनाचा कार्यक्रम होणार आहे.