यूपी योद्धाजकडून तेलुगू टायटन्स पराभूत

पुणे : 2024 च्या प्रो कबड्डी लीग स्पर्धेतील येथे खेळविण्यात आलेल्या 91 व्या सामन्यात गगन गौडाच्या शानदार कामगिरीच्या जोरावर यूपी योद्धाजने सुरुवातीच्या पिछाडीनंतर तेलुगू टायटन्सचा 36-33 अशा तीन गुणांच्या फरकाने निसटता पराभव केला. हा सामना शेवटच्या क्षणापर्यंत चुरशीचा झाला. या सामन्यात मध्यंतरापर्यंत तेलुगू टायटन्सने यूपी योद्धाजवर 17-10 अशा सात गुणांची आघाडी मिळविली होती. पण त्यानंतर गगन गौडा आणि भवानी रजपूत यांनी अनुक्रमे 15 आणि 6 गुण मिळविले. सामन्याच्या उत्तराधार्थ यूपी योद्धाजचा खेळ तेलुगू टायटन्सच्या तुलनेत अधिक अचूक आणि वेगवान झाला. गगन गौडाने आपल्या चढाईवर यूपी योद्धाजला झटपट गुण मिळवून दिल्याने यूपी योद्धाजने तेलुगू टायटन्सवर काही गुणांची आघाडी घेतली. गगनगौडाने सुपर 10 गुण नोंदवित यूपी योद्धाजला 3 गुणांनी आघाडीवर नेले.