वृत्तसंस्था /नवी दिल्ली
माहिती तंत्रज्ञान कंपनी टेक महिंद्राने 30 सप्टेंबर रोजी संपलेल्या चालू आर्थिक वर्षाच्या दुसऱ्या तिमाहीचे आर्थिक निकाल जाहीर केले आहेत. शेअर बाजाराला दिलेल्या माहितीत कंपनीने सांगितले की तिच्या एकत्रित निव्वळ नफ्यात 61 टक्क्यांनी घट झाली आहे. 505.3 कोटी रु. इतका निव्वळ नफा यंदाच्या तिमाहीत कंपनीने कमावला आहे. मागच्या आर्थिक वर्षाच्या याच तिमाहीत कंपनीने 1,299.2 कोटी रुपयांचा निव्वळ नफा कमावला असल्याचीही माहिती यावेळी दिली आहे.
कंपनीच्या उत्पन्नात घट
स्टॉक एक्स्चेंजला पाठवलेल्या माहितीमध्ये कंपनीने म्हटले आहे की दुसऱ्या तिमाहीत एकत्रित महसूल दोन टक्क्यांनी घसरून 12,864 कोटी रुपये झाला आहे, जो मागील आर्थिक वर्षाच्या याच कालावधीत 13,129.5 कोटी रुपये होता. तिमाही आधारावर कंपनीच्या एकूण उत्पन्नात 1.72 टक्क्यांनी घट झाली आहे.
12 रुपयांच्या लाभांशाची घोषणा
आर्थिक निकालांच्या घोषणेबरोबरच, टेक महिंद्रा लिमिटेडने बुधवारी 5 रुपये दर्शनी मूल्याच्या प्रत्येक इक्विटी शेअरवर 12 रुपयांचा लाभांश जाहीर केला. 2 नोव्हेंबर ही अंतरिम लाभांश मिळण्यास पात्र असलेल्या सभासदांना निश्चित करण्यासाठी विक्रमी तारीख आहे. टेक महिंद्राच्या संचालक मंडळाने तीन सहकारी कंपन्यांच्या विलीनीकरणालाही बैठकीत मान्यता दिली आहे. या विलीनीकरणामध्ये पेरिगॉर्ड प्रीमिडिया (इंडिया), पेरिगॉर्ड डेटा सोल्युशन्स (इंडिया) आणि टेक महिंद्रा सेरिअम या तीन कंपन्यांचा समावेश आहे. तथापि, हे विलीनीकरण नियामक मान्यतेच्या अधीन असेल. याचाही परिणाम म्हणून कंपनीचे समभाग घसरले आहेत.
